दोहा– कुवेतमा ८२ जना नेपाली अलपत्र परेका छन् । नेपालबाट विभिन्न समयमा कुवेत पुगेका ८२ जना नेपाली कामदारहरू अहिले न काम न दाम भएपछि अलपत्र परेका हुन् ।
त्यसो त कुवेतमा पछिल्ला केही दिन यता विभिन्न कम्पनीमा कार्यरत नेपाली कामदारहरू अलपत्र पर्ने क्रम बढेको छ ।
कुवेतस्थित वरबा ओइल सर्भिसेस कम्पनीमा उनीहरू अलपत्र अवस्थामा रहेका छन् ।
कोरोनाका कारण सप्लाई कम्पनी बन्द भएपछि ६ महिनादेखि आफूहरू अलपत्र परेको पीडितहरूमध्ये नवलपरासीका मुक्तिप्रसाद न्यौपानेले बताएका छन् ।
कोरोनाका कारण अहिले कम्पनी बन्द भएपछि ६ महिनादेखि न काम, न दाम भएर बस्नु परेको पीडितहरूको भनाइ छ ।
कम्पनीले लिएको साइट बन्द भएपछि कम्पनीले बेवास्ता गरेको कारण आफूहरू अलपत्र परेको पीडितहरूले बताएका छन् ।
अलपत्र परेकाहरूले पटक–पटक कि आधा तलब कि त घर पठाइदेऊ भनेर माग गरेको भए पनि कम्पनी प्रशासनले झुक्याउने काम मात्र गरेको पीडितहरू बताउँछन् ।
पीडितहरूका अनुसार मंगलबारसम्म कम्पनीले खान दिएको तर, अब बुधबारदेखि खाना दिन नसक्ने भन्दै खाना बन्द गरेको कारण आफूहरू थप समस्यामा पारेको बताएका छन् ।
कम्पनीले खाना पनि बन्द ग¥यो, आफूहरूसँग पैसा छैन अब कसरी बाच्ने हो ? यो अवस्थामा छिटोभन्दा छिटो उद्धारका लागि पहल गर्न उनीहरूले नेपाल सरकारलाई आग्रह गरेका छन् ।
आफूहरूलाई कम्पनीले खाना बन्द गरेपछि कुवेतस्थित नेपाली दूताबासलाई जानकारी गराएको र दूताबासले चाँडै उद्धार तथा राहतका लागि पहल गर्ने आश्वासन दिएको उनीहरूले बताएका छन् ।
यसअघि पनि कुवेत पुगेर बिचल्ली परेका ३३ नेपालीलाई एनआरएन कुवेतले खाद्यान्न सहयोग गरेको थियो ।
अझै उनीहरू पनि कुवेतमै विगत लामो समयदेखि उद्दारको पर्खाइमा रहेका छन् । अहिले उनीहरू धमाधम बिरामी पर्न थालेका छन् । कुवेतलगायत खाडीका अन्य अरब देशहरूमा अलपत्र पर्ने नेपालीहरूको संख्या दिन प्रतिदिन बढिरहेको छ ।
-1745656903.jpeg)