काठमाडौं– एक सातादेखि दुबई एयरपोर्टमा अलपत्र अवस्थामा रहेका २६२ नेपाली आइतबार उद्धार उडानमार्फत स्वदेश फर्किएका छन् ।
चार्टर्ड उडान रोकिएपछि दुबई विमानस्थलमा उनीहरू अड्किएका थिए । उनीहरूलाई नेपाल वायु सेवा निगमको वाइड बडी ए–३३० जहाजले काठमाडौं ल्याएको हो ।
दुबईबाट नेपाली लिएर फर्किएको जहाज आइतबार साँझ त्रिभुवन अन्तर्राष्ट्रिय विमानस्थलमा अवतरण गरेको थियो । विमानस्थल कार्यालयका अनुसार निगमको जहाजले दुबईबाट २६२ यात्रु र दुई बच्चा काठमाडौं ल्याएको छ ।
निगमका अपरेशनल विभाग प्रमुख दीपु जुहार्चनले उक्त जहाजले काठमाडौंबाट दुबई उडानमा १६४ यात्रु र एक बच्चा लगेको थियो ।
संस्कृति, पर्यटन तथा नागरिक उड्डयान मन्त्रालयको स्वीकृतिमा निगमले काठमाडौं–दुबईका लागि रद्द उद्धार उडान सञ्चालन गरेको हो ।
निगमको गत १८ अगष्टका लागि दुबईबाट काठमाडांैका लागि तय गरिएको उडान यात्रुलाई काठमाडौंमा क्वारेन्टिनको व्यवस्थापन नभएको भन्दै सरकारले स्थगित गरेको थियो । उडान स्थगित गरेपछि त्यसको चौतर्फी आलोचना भएको थियो ।
निगमको वाइडबडी जहाज दुबईबाट रित्तै काठमाडौं फर्किएकाले विरोध भएको हो । जहाज रित्तै फर्कँदा उडानका लागि दुबई एयरपोर्टमा तयारी अवस्थामा रहेका यात्रु अलपत्र परेका थिए ।
उक्त दिन दुबइबाट काठमाडौं उडानका लागि टिकट लिइसकेका यात्रुलाई आइतबार काठमाडौं ल्याइएको हो । हालैको मन्त्रिपरिषद् बैठकले उद्धार उडान सञ्चालन गर्न अनुमति दिएको थियो ।
विमानस्थलका महाप्रवन्धक देवेन्द्र केसीका अनुसार आइतबार विभिन्न मुलुकबाट नेपालीलाई स्वदेश फर्काउन तथा कार्गोका लागि आगमन र प्रस्थान दुबै गरी चार अन्तर्राष्ट्रिय उडान भएका छन् ।
नेपाल एयरलाइन्सले दुबईबाट नेपालीको उद्धार गरी काठमाडौं ल्याएको छ भने हिमालय एयरलाइन्सको चीनको कुनमिङमा दुई उडान हुँदैछ । हिमालयका दुबै जहाज आइतबार राति गन्तब्यतर्फ उड्ने विमानस्थलले जनाएको छ ।
आइतबार नै भोल्गा ड्नेपर एयरलाइन्स नागपुरबाट १७ हजार केजी कार्गो काठमाडौं ल्याएको छ । यस्तै आज सोमबार उद्धार तथा कार्गो गरी चार अन्तर्राष्ट्रिय उडान हुने विमानस्थलले उडान तालिका सार्वजनिक गरेको छ ।
