दोहा– साउदीमा अलपत्र २३ नेपाली अवस्था दयनीय बन्दै गएको छ । कम्पनीले पाँच महिनादेखि तलब नदिएको र खान बस्नका लागिसमेत समस्या भएकाले उनीहरूले कहिँ कतैबाट पनि अहिलेसम्म सहयोग नपाएको गुनासो गरेका छन् ।
पीडितहरूका अनुसार नेपालबाट आउँदा भनिएको कम्पनीमा काम नदिएर नास ट्रस्र्ट स्काफोलडिङ कम्पनीमा काम गर्न लगाइएको छ । यो कम्पनीमा पुगेपछि केही महिना मात्र काम गरेका उनीहरूलाई कोरोना सुरु हुनेबित्तिकै सबैलाई कामबाट निकाली दिएको र तलब पनि नदिएको हुँदा अलपत्र अवस्थामा बस्नुपर्ने बाध्यता सिर्जना भएको पीडितले गुनासो पोखेका छन् ।
खाने बस्ने सुविधासहित आठ घन्टाको १ हजार साउदी रियाल हुन्छ भनेर पठाएको तर यहाँ कम्पनीले आठ घन्टाको सुख्खा ९ सय रियाल दिने गरेको थियो भने कम्पनी बन्द भएपछि ४ महिनाबाट न काम, न दाम भएर बस्नु परेको उनीहरूको भनाइ छ ।
बिरामी हुँदासमेत समान्य औषधि उपचार पनि नगरेको भन्दै कम्पनीले तलब पनि नदिने र घर फर्किने टिकट पनि नदिने बताएका छन् । उनीहरूका अनुसार कम्पनीले जे मन लाग्यो गर्नु केही सहयोग गर्न नसकिने भएपछि आफूहरूले साउदीस्थित नेपाली दूताबाससँग उद्धारका लागि पहल गरिदिनु आग्रह गेरको भए पनि कुनै सुनाई नभएको पीडितहरू बताउँछन् ।
यता, दूताबासले भने पीडितहरूले काम नभएर बसेको धेरै समय भएको जनाउँदै उद्दारका लागि कम्पनी प्रसाशनसँग समन्वय गरिरहेको जनाएको छ । एनआरएनए साउदीले पनि नेपाली दूताबास र कम्पनीलाई उनीहरूको समस्या तत्काल समाधान गर्न ताकेता गरिरहेको एनआरएनए मध्यपूर्व सहसंयोजक राजेन्द्र अर्यालले बताए ।
