काठमाडाैं- नेपाली कांग्रेसका सभापति गगन थापाले एउटा चुनावको पराजयबाट आफू नआत्तिने र नडराउने बताएका छन्। उनले मधेस प्रदेशको जनकपुरधाममा बुधबार आयोजित चुनावी समीक्षामा बताएका हुन् ।
उनले चुनावी समीक्षामा बोल्दै अब पार्टी शुद्धीकरणमा लाग्ने बताए । उनले भने," नेपाली कांग्रेस पार्टीको कार्यकर्ता हो, एउटा चुनावको जय वा पराजयबाट डराउने वा आत्तिने होइन।"
फागुन २१ को प्रतिनिधि सभा निर्वाचनमा थापा सर्लाही ४ बाट पराजित भएका थिए। त्यसपछि थापा 'मौन' रहेको भन्दै चर्चासमेत हुने गरेको छ। त्यसतर्फ लक्ष्य गर्दै सभापति थापाले मैले केही समय लिन खोजेको हो। किन समय लिन खोजेको भने- हामीले धेरै कुरा सुन्नुपर्ने रहेछ। धेरै नयाँ कुरा सिक्नुपर्ने रहेछ। दौडेर मात्र हुँदैन, केही तयारी गर्नुपर्छ।
उनले वैशाख १ गते आफूले काठमाडौं महानगर वडा नम्बर ३० को कार्यसमितिबाट क्रियाशील सदस्यता नवीकरण गर्ने पनि बताए । ‘हामीले केन्द्रीय समितिबाट सबैको क्रियाशील सदस्यता खारेज गरेका छौं, अहिले क्रियाशील सदस्यता छैन,’ उनले भने, ‘अब वैशाखदेखि फेरि नवीकरण र वितरण हुन्छ।’
पार्टीले अब क्रियाशील सदस्यको संख्याभन्दा गुणस्तरीय, प्रतिबद्ध र इमानदार कार्यकर्तामा जोड दिने उनले बताए । उनले पार्टीभित्र शुद्धीकरण अभियान सञ्चालन गरिने र कम संख्या भए पनि जिम्मेवार कार्यकर्ताको बलमा संगठन सुदृढ बनाइने बताए।
