काठमाडाैं - अमेरिकी पर्वतारोही तथा स्कीयर जिम मोरिसनले इतिहास रचेका छन्। उनले सगरमाथाको उत्तरी भागमा पर्ने हर्नबिन कुल्वार मार्ग हुँदै पहिलो पटक स्की गर्दै झरेर विश्वमा नयाँ रेकर्ड कायम गरेका हुन्।
यो अवतरण अक्टोबर १५ मा सम्पन्न भएको हो, जुन उच्च हिमाली स्कीइङ इतिहासको एउटा महत्वपूर्ण क्षण मानिएको छ। नेशनल जियोग्राफिकका अनुसार ५० वर्षीय मोरिसनले ८,८४८ मिटर उचाइमा रहेको सगरमाथाको शिखर १२:४५ बजे पुगेपछि रङबुक हिमनदीसम्म करिब ९,००० फिट तल स्की गर्दै झरेका थिए।
उनले अत्यन्त कठिन र जोखिमपूर्ण हर्नबिन र जापानी कुल्वार जोडिएको बाटो रोजेका थिए। मोरिसनले यो आरोहण आफ्नो दिवंगत साझेदार हिलारी नेल्सनलाई समर्पण गरेका थिए र उनको अस्थी सगरमाथाको शिखरमा विसर्जन गरेका थिए। यो अभियान नेशनल जियोग्राफिकका लागि ओस्कर विजेता निर्देशक जिमी चिन र चाइ वासरहेलीले निर्देशन गरिरहेका छन्।
टोलीमा ११ जना सहयोगीहरू, जसमा शेर्पा र प्राविधिक सदस्यहरू पनि थिए, संलग्न थिए। यो मोरिसनको तेस्रो प्रयास थियो। अघिल्ला प्रयासहरू हिमपहिरो र अनुमति समस्याका कारण रोकिएका थिए। हर्नबिन कुल्वार पहिलोपटक १९६३ मा टम हर्नबिन र विल्ली अनसोल्डले आरोहण गरेका थिए र त्यसपछिका ३० वर्षभन्दा बढी समयपछि यो मार्गमा सफल आरोहण भएको हो।मोरिसनको यो उपलब्धि अहिले सम्मको सर्वाधिक साहसी स्की अवतरण मध्ये एक मानिएको छ।
