टोकियो - कपाल सेतो हुनु केवल उमेर बढेको संकेत मात्र होइन, शरीरको क्यान्सरविरुद्धको प्राकृतिक सुरक्षा प्रक्रियासँग पनि जोडिएको हुनसक्ने नयाँ अध्ययनले देखाएको छ।
जापानको टोकियो विश्वविद्यालयका वैज्ञानिकहरूले Nature Cell Biology पत्रिकामा प्रकाशित गरेको अनुसन्धान अनुसार कपालको रंग बनाउने मेलानोसाइट स्टेम सेल (McSCs) हरूमा डीएनएमा क्षति हुन थालेपछि ती कोशिकाहरूले आफैंलाई निष्क्रिय बनाइदिन्छन्। यसले कपालको रङ बन्न रोकिन्छ र कपाल सेतो देखिन थाल्छ।
अनुसन्धानकर्ताहरूका अनुसार, यदि यी क्षतिग्रस्त कोशिकाहरूले आफ्नो काम जारी राखे भने तिनीहरू मेलानोमा (Melanoma) नामक घातक त्वचा क्यान्सरमा परिणत हुन सक्थे। त्यसैले शरीरले रङ त्यागेर कोशिकाको सुरक्षा गर्ने विकल्प अपनाउँछ।यस प्रक्रियालाई senescence-coupled differentiation भनिन्छ ,अर्थात् कोशिकाले ‘कामबाट अवकाश’ लिएर शरीरलाई दीर्घकालीन जोखिमबाट जोगाउने उपाय।
साधारण भाषामा भनौँ भने कपाल सेतो हुनु कहिलेकाहीँ शरीर भित्र क्यान्सर बन्न नदिने बचाउ संकेत हुनसक्छ।तर वैज्ञानिकहरूले चेतावनी दिएका छन् कि सबै अवस्थामा यो प्रक्रिया प्रभावकारी नहुन सक्छ। अत्याधिक घाम (UV किरण) वा विषाक्त वातावरणको दबाबमा कतिपय कोशिकाहरू निष्क्रिय नहेर निरन्तर विभाजन जारी राख्न सक्छन्, जसले उल्टो क्यान्सरको खतरा बढाउन सक्छ।शोधकर्ताहरूका अनुसार यो अध्ययनले बुढ्यौली, कपालको रङ र क्यान्सर जोखिमबीचको सम्बन्धलाई बुझ्न नयाँ मार्ग खोलेको छ।
