टोकियो - टोकियो सरकारले सञ्चालन गरेको एआई आधारित विवाह–परिचय सेवा “TOKYO Enmusubi ” ले विगत वर्ष सेप्टेम्बरमा पूर्ण रूपमा सञ्चालनमा आएपछि हालसम्म ९४ जोडीको विवाह सम्पन्न गराउन सफल भएको छ। जापानमा घट्दै गएको जन्मदर र युवाहरूको विवाहदर सुधार गर्ने उद्देश्यसहित यो पहल गभर्नर युरिको कोइकेको नेतृत्वमा अघि बढाइएको हो।
सामान्य डेटिङ एपहरूजस्तै केवल बाह्य रूप वा सामान्य प्रोफाइल मात्रलाई आधार नबनाई,TOKYO Enmusubi ले व्यक्तिको जीवनशैली, सोच, मूल्यहरू र आत्मअनुकूलताको विश्लेषण गरी सम्भावित जोडी मिलाइदिन्छ। यस सेवाको अर्को महत्वपूर्ण विशेषता उच्च सुरक्षा र विश्वसनीयता हो।
प्रयोगकर्ताले सेवा प्रयोग गर्न वैवाहिक स्थिति प्रमाणपत्र (Certificate of Singleness) र आफ्नो पहिचान कागजात अनिवार्य रूपमा बुझाउनुपर्छ। यसले प्रयोगकर्ताहरूलाई निजी एपहरू भन्दा बढी विश्वास र सुरक्षाको अनुभूति गराएको बताइएको छ।
सेप्टेम्बरको अन्त्यसम्म, यो सेवामा २७ हजारभन्दा बढी १८ वर्ष वा सोभन्दा माथिका प्रयोगकर्ता दर्ता भइसकेका छन्, जसले टोकियोमा बसोबास गर्ने, अध्ययन गर्ने वा काम गर्ने व्यक्तिहरूलाई समेट्छ। यससँगै टोकियो महानगरले साना–साना भेटघाट कार्यक्रम, विवाह परामर्श, र निःशुल्क जानकारी मेलाहरू पनि सञ्चालन गरिरहेको छ, ताकि इच्छुक व्यक्तिहरूलाई प्रत्यक्ष रुपमा भेटघाटको अवसर मिलोस्।
जापान डेलीमा उल्लेख गरेकाे अध्ययनहरूका अनुसार, विवाह गर्न चाहने तर सक्रिय रूपमा जोडी खोज्न नलाग्ने अविवाहित व्यक्तिहरूको संख्या जापानमा निकै धेरै छ। यो पहलले त्यस्ता मानिसहरूलाई सम्बन्ध सुरु गर्न महत्वपूर्ण प्रेरणा र वातावरण प्रदान गर्ने लक्ष्य राखेको छ।
