बेइजिङ- चिकित्सा क्षेत्रमा ऐतिहासिक सफलता हासिल भएकाे छ। Sun Yat-sen University ले चीनकी २५ वर्षीया एक युवतीमा स्टिम-सेल(stem cell) थेरापीमार्फत टाइप १ मधुमेह (Type 1 Diabetes) बाट पूर्णरूपमा निको भएकाे पुष्टि भएको हाे।
दीर्घकालीन अटोइम्युन रोगविरुद्धको उपचारमा यो उपलब्धिलाई विश्वकै पहिलो सफल उपचारको रूपमा नयाँ सम्भावना खोलेको छ। टाइप १ मधुमेहमा शरीरको प्रतिरक्षा प्रणालीले प्यान्क्रियासमा रहेको इन्सुलिन उत्पादन गर्ने बीटा–कोषिका (Beta Cells) नष्ट गरिदिन्छ, जसका कारण बिरामीलाई जीवनभर दैनिक इन्सुलिन इंजेक्शनमा निर्भर रहनुपर्थ्यो। तर, चीनका चिकित्सकहरूले यसपटक प्रगतिशील स्टेम-सेल प्रविधि प्रयोग गर्दै बिरामीकै रक्त-कोषिकालाई पुनःप्रोग्राम गरी इन्सुलिन उत्पादन गर्ने कोषिकामा परिवर्तन गरेर ती कोषिका फेरि शरीरमा प्रत्यारोपण गरेका हुन् ।
प्रत्यक्ष उपचारपछि केही महिनामै बिरामीको शरीरले स्वाभाविक रूपमा इन्सुलिन उत्पादन गर्न सुरु गरेकाे चिकित्सकहरूले बताएका छन् । हालसम्मको चिकित्सकीय रिपोर्टअनुसार, उनलाई कुनै इन्सुलिन इंजेक्शनको आवश्यकता नपरेको र उनको रक्त–चिनी सामान्य स्तरमा रहेको पुष्टि गरिएको छ।
विशेषज्ञहरूले यस घटनालाई दीर्घकालीन मधुमेह उपचार क्षेत्रमा ऐतिहासिक प्रगति भएको बताएका छन्। यदि यो सफल परिणाम ठूलो क्लिनिकल परीक्षणमा पनि दोहोर्याउन सकियो भने, विश्वभरका लाखौँ टाइप १ मधुमेहका बिरामीका लागि स्थायी उपचारको बाटो खुल्न सक्छ।चिकित्सा विशेषज्ञहरूका अनुसार, यो उपलब्धिले पुनर्जनन चिकित्सा (Regenerative Medicine) लाई नयाँ उचाइमा पुर्याएको छ।
तर यो अहिले पनि प्रारम्भिक चरण (early-stage clinical breakthrough) मा छ।ठूलो संख्यामा बिरामीमा परीक्षण हुन अझै बाँकी छ। यो उपचार पूर्ण प्रमाणित सर्वसाधारण उपचार योजना बनेको छैन, तर स्थायी निको हुने सम्भावना पहिलो पटक प्रमाणित भएको ऐतिहासिक कदम भने बनेको छ।
