काठमाडौं- रावासावा प्राज्ञिक समाज नेपालद्वारा अयोजित ललितकला प्रज्ञाप्रतिष्ठानमा साहित्यकार डा. सुकराज राई (चमा थुलुङ)का तीन कृति एकैसाथ लोकार्पण गरिएको छ । माननीय रक्षामन्त्री मानवीर राईको प्रमुख अतिथिमा सो कृति लोकार्पण गरिएको हो ।
शुक्रबार भएको एक समारोहबीच रावासावा प्राज्ञिक समाज नेपालका अध्यक्ष बम वाणियाको अध्यक्षतामा सम्पन्न भएको उक्त कृतिहरू ‘थुलुङ मुन्धुममा सृष्टि, संस्कार र संस्कृति’ (थुलुङ मुन्दुम दर्शन) ‘मियाप्मा’ (महाकाव्य) र ‘मेरी अर्की पारिजात दिदी’ (कथासङ्ग्रह) रहेका छन् ।
कार्यक्रममा मन्तव्य दिँदै रक्षामन्त्री राईले वर्तमान गणतन्त्रलाई असफल बनाउन विविध समूह सक्रिय रहेको उल्लेख गर्दै बैंकको ऋण तिर्न नसक्ने वा सहकारी घोटालामा संलग्नहरू समेत प्रणालीविरुद्ध लाग्नु विडम्बना भएको टिप्पणी गरे । उनले राजनीतिक प्रतिशोधका नाममा सरकारलाई दोषारोपण गर्नुको कुनै औचित्य नभएको पनि बताए । पुस्तक लेखन अनुभव सुनाउँदै डा. सुकराज राईले वरिष्ठ कवि जसराज किरातीप्रतिको उच्च सम्मान व्यक्त गरे । उनले ‘हामी लेखक बन्नुमा जसराज किरातीको योगदान छ, उहाँको सिकाईँ र प्रेरणाले नै आज लेखक भएको छु’, भन्दै कृतज्ञता प्रकट गरे ।
विमोचित कृतिहरूमाथि टंक भट्टराई, डा. धनप्रसाद सुवेदी र डा. विष्णु राईले समीक्षा तथा बिमर्श प्रस्तुत गरेका थिए । सोही अवसरमा नेपाल ललितकला प्रज्ञाप्रतिष्ठानका कुलपति नारदमणि हार्तम्छालीले पुस्तक प्रकाशनप्रति शुभकामना व्यक्त गरेका थिए । कार्यक्रममा पूर्वसंविधानसभा सदस्य माननीय विशाल भट्टराई, राष्ट्रिय वाङ्मय कला प्रतिष्ठानका पूर्वअध्यक्ष विष्णु आभूषण, वरिष्ठ कवि जसराज किराती, कानुनविद् देवराज कटुवाललगायत उपस्थिति रहेको थियो ।
