सांसदलाई विधायक पनि भनिन्छ । यसको अर्थ हो- प्रतिनिधिसभामा उनीहरु निर्वाचित भएर पठाउनुको कारण कानुन बनाउनु । देश र जनताका लागि सुशासनको अनुभूति दिन परिपक्व कानुन बनाउन अक्षर अक्षरको अध्ययन गर्नुपर्छ । तर पछिल्लो समस सांसदहरुको काम ताली बजाउने सिवाय अरु देखिन्न ।
यसको पछिल्लो उदाहरण हुन् संघीय निजामती सेवा विधेयकको संशोधनमा भएको छलछाम थाहा नहुनु र संवैधानिक परिषद्सम्बन्धी विधेयक राष्ट्रपति कार्यालयमा पुगेर फेरि प्रतिनिधिसभामै फिर्ता हुनु । निजामती सेवा विधेयकमा कर्मचारीहरुलाई ‘कुलिङ पिरियड’मा पठाउनुपर्छ भन्ने व्यवस्था थपिएको थियो । तर संसदीय समिति हुँदै प्रतिनिधिसभाबाट यो पारित भएर गयो-जहाँ कुलिङ पिरियड निष्प्रभावी बनाइएको थियो । त्यो पनि एउटै अक्षर ‘बाहेक’ राखेर । यस्तो व्यवस्था हुँदा पनि प्रतिनिधिसभाका सांसदहरुले टेबल ठोकेर विधेयक पारित गरेर पठाए ।
तर यो शब्दमा गोलमाल गरेको भन्दै राज्य व्यवस्था समितिका सभापति र संसद्का कर्मचारीहरुमाथि बयान लिन संसद्ले संसदीय छानबिन समिति बनाएको छ । जबकि यो विधेयक सरासर पारित हुनुमा सम्पूर्ण सांसदहरु दोषी छन् । यसैगरी संवैधानिक परिषद् (काम, कर्तब्य, अधिकार र कार्यविधि) सम्बन्धी ऐन २०६६ लाई संसोधन गर्न बनेको विधेयकमा पनि सांसदहरु चिप्लिएका छन् । विधेयकमा संविधानको मर्मभन्दा ठीक उल्टो व्यवस्था हुँदा पनि अध्ययनविनै टेबुल ठोकेर पठाइएको देखिएको छ । त्यो पनि दुवै सदनबाट ।
संवैधानिक परिषद्मा प्रधानमन्त्री अध्यक्ष र सदस्यहरुमा प्रधानन्यायाधीश, विपक्षी दलका नेता, सभामुख, राष्ट्रिय सभा अध्यक्ष र उपसभामुख गरी छ जना सदस्य हुने संवैधानिक व्यवस्था छ । यस्तो हुँदा परिषद्को बहुमत पुग्न चार जना अनिवार्य चाहिन्छ । तर संसद्बाट राष्ट्रपतिकहाँ पुगेको संशोधन विधेयकमा तीन जनाको उपस्थितिमा अध्यक्षसहित अर्को एक जनामात्र भए पुग्ने व्यवस्था गरिएको पाइयो । त्यसपछि राष्ट्रपति रामचन्द्र पौडेलले कानुनी परामर्श लिएर विधेयक पुनः प्रतिनिधिसभामै पठाइदिए ।
यो पुनर्विचारका लागि पठाइएको हो । यसमा प्रधानमन्त्री र शीर्ष नेताहरुले चलाखी गरेको भए पनि सांसदहरु भने पूरै ‘हुस्सु’ बने । संसद्मा मच्चीमच्ची एकअर्कालाई गाली गर्ने सांसदहरुले विधेयकका बुँदाहरु पढ्न जानेनन् । त्यसै त जनताका प्रतिनिधि बनेर सदनमा पुगेकाहरुले पढ्दैनन्, हावादारी गफमात्र गर्छन् भन्ने परेको बेला यस्ता गल्ती गर्दै जाँदा सांसद पदको गरिमा घट्दै जाने देखिएको छ ।
