लामो राजनीतिक तथा आर्थिक संक्रमणबाट गुज्रिएको नेपालमा अर्थतन्त्रलाई धान्ने मुख्य खम्बाको रुपमा वैदेशिक रोजगार रहँदै आएको सबैलाई जानकार नै छ । मुलुकको अर्थतन्त्रको करिब ३० प्रतिशत वैदेशिक रोजगारीमा गएकाहरुले पठाउने रेमिट्यान्सबाट धानेको सरकारी तथ्यांक नै छ । मुलुकमा राजनीतिक स्थायित्व र आर्थिक गतिविधि चलायमान हुन नसक्दा रोजगारीको अवसर सिर्जना हुन सकेन । जसको परिणाम युवाहरु रोजगारीका लागि विदेश जानुपर्ने बाध्यता छ । अहिले देशको कुनै गाउँ होला, जहाँबाट वैदेशिक रोजगारीमा नगएको । अझ कतिपय गाउँमा त प्रत्येक घरका कम्तीमा एक जना वैदेशिक रोजगारीमा गएकै हुन्छ ।
मुलुकभित्रै रोजगारीको अवसर नपाएर विदेसिने युवाहरुलाई विभिन्न प्रलोभनमा पारेर ठगिने गरिएको छ । वैदेशिक रोजगारीको यात्रा सुरु गर्दादेखि नै ठगिने उनीहरु कार्यस्थलमा पनि उही समस्या भोग्न बाध्य हुन्छन् । उनीहरु आर्थिक, मानसिक र भौतिक शोषणमा पर्छन् । यो विडम्बनापूर्ण अवस्था आजसम्म अन्त्य हुन सकेको छैन । यद्यपि, उनीहरुले विदेशी भूमिमा बगाएको पसिनाको कमाइले नै आजसम्म मुलुक धानेको छ । यही अर्थतन्त्र धान्ने क्षेत्र बनेको वैदेशिक रोजगारमा आर्थिक चलखेल र ठगीको विषय नौलो रहेन ।
यहीबीच म्यानपावर कम्पनीको अनुगमन गर्ने नाममा वैदेशिक रोजगार विभागका कर्मचारीसमेत आर्थिक लाभ लिन लागिपरेको वैदेशिक रोजगार व्यवसायीहरुले आरोप लगाएका छन् । अनुगमनमा गएर कागजात नियन्त्रणमा लिने र आर्थिक लाभ लिएर फिर्ता गर्ने गरेको उनीहरुको दाबी छ । संस्थाको त्रुटि नभए पनि अनुगमनमा आएका विभागका कर्मचारीले पैसामा मिलाउन सकिने प्रस्ताव गर्ने गरेको गम्भीर आरोप लागेको छ । अनुगमनमा खटिएका कर्मचारीले रकमको बार्गेनिङ गर्न त्रुटि नै नभए पनि पासपोर्ट तथा अन्य कागजात लिएर हिँड्ने गरेको उनले आरोप लगाए ।
विभागका कर्मचारीमाथि लागेको यो आरोप गम्भीर छ । यदि यो सत्य हो भने कानुनी शासन पालना गराउने जिम्मेवार निकायका कर्मचारीबाट हुने यस्तो हर्कतले सुशासनलाई खिल्ली उडाउने तथा भ्रष्टाचार र बेथितिलाई संस्थागत गर्दछ । विभागले आफ्ना कर्मचारीमाथि लागेको यो आरोपको छानबिन गरी यस्ता विकृति नियन्त्रण गर्न जरुरी छ । व्यवसायीहरुले आरोप लगाए जसरी कर्मचारीहरु अनुगमनको नाममा आर्थिक लाभ लिन लागेको पाइए उनीहरुमाथि कारबाही गरियोस् ।
a
