शक्तिशाली दुई दल मिलेर बनेको सरकारले वर्ष दिन पुगेको छ । यो बेला सरकारको कार्यसम्पादन र मन्त्रीहरुको कार्यक्षमतामाथि समीक्षा गर्ने समय हो । हुन त मन्त्रीहरुले दैनिक वर्ष दिनको कार्यसम्पादन रिपोर्ट सार्वजनिक गरिरहेका छन् । तर तिनले जनताको ध्यान तान्न सकेको छैन । कारण, एमाले अध्यक्ष केपी शर्मा ओलीको नेतृत्वमा रहेका मन्त्रीहरुको काम गराई जनतालाई फिटिक्कै चित्त बुझेको छैन ।
उनीहरुको प्रगति विवरणभन्दा पनि सरकार कहिले परिवर्तन हुन्छ भन्ने विषय अहिलेको चासोको विषय बनेको छ । एक त नेपालमा नौ–नौ महिनामा सरकार पविर्तन भइरहने भएकै कारण कतै सत्तापलट हुन्छ कि भन्ने अनुमान हो । अर्कोचाहिँ ओली नेतृत्वसँग आक्रोशितहरु कतै एमालेकै नेतृत्व परिवर्तन हुन्छ कि भन्ने आशाले पनि हो । यसरी पछिल्लो दिन सरकारमाथि समीक्षाभन्दा पनि सर्वसाधारणदेखि दलहरु च्यासलको समीक्षामा लागेका छन् । हुन पनि दुईपटक राष्ट्रपति भइसकेकी विद्यादेवी भण्डारीको सक्रिय राजनीतिमा पुनरागमनले राजनीतिक माहोल तातिएको छ । ओलीप्रति आक्रोशितहरुले भण्डारीको ‘कमब्याक’लाई स्वागत गरेका छन् । यद्यपि, देशको सर्वोच्च पदमा पुगिसकेकी भण्डारी सक्रिय राजनीतिमा आउनु सकारात्मक हैन ।
अहिले ओलीले उनको सदस्यता नवीकरण भयो कि भएन भन्ने विषयमै जनचासो र छलफलको विषय बनाइदिएका छन् । त्यसैले पनि सर्वसाधारण पनि अहिले सरकारले दैनिक गर्नुपर्ने कामभन्दा दलकै रमिता हेर्न रौसिरहेका छन् । सत्ताको नेतृत्व गरिरहेको एमालेको पार्टी कार्यालय च्यासलमा यो रमाइलो भइरहँदा सबैभन्दा ठूलो दल नेपाली कांग्रेसभित्र पनि दरार पैदा भएको छ ।
झिनो मत रहेको संस्थापनइतरका नेता डा. शेखर कोइरालाले सत्ता समीकरण बदल्ने प्रयास गर्दा बूढानीलकण्ठ त्रसित देखिएको छ । त्यसैले कांग्रेस सभापति शेरबहादुर देउवाले आफूनिकट नेताहरुलाई मोर्चाबन्दी गर्न खटाएको देखिन्छ । यही मेसोमा संसद् पनि बन्द छ । अहिले बाढीपहिरोको जोखिम छ, डेंगीको जोखिम उत्तिकै बढेको छ । कोरोनाका कारण स्वास्थ्य संकट देखिन थालेको छ । घुस काण्डमा धमाधम मन्त्रीहरु नै मुछिन थालेको विषय बाहिर आएको छ । प्रदेशको बजेट विनियोजन अमिल्दो हुँदा सरकारप्रति जनता निराश छन् । तर यी विषय छल्न दलहरुले आफैंभित्र कलह देखाउँदै ‘माछो, माछो, भ्यागुतो’ खेल खेलिरहेका छन् । यसरी जनतालाई छक्याएर गोलमटोल गर्नु आफ्नै खुट्टामा बञ्चरो हान्नुसरह हो है शीर्ष दलका नेताहरु !
