भारतको नयाँ दिल्लीमा दुई चुनावमा अत्यधिक मत ल्याएर दिल्ली सरकार चलाएको आम आदमी पार्टी यसपटक दोस्रो बनेको छ । यस पार्टीका अरविन्द केजरीवाल जो दुईपटक मुख्यमन्त्री बनेका थिए, निर्वाचनमा पराजित भएका छन् । कामको राजनीति भन्दै भारतमा भारतीय जनता पार्टी र कांग्रेस आइलाई झण्डै निमिट्यान्न पारेको दल मदिरा घोटाला काण्डमा मुछिएसँगै जनताको मूल्यांकनमा परेको हो ।
दिल्ली विधानसभामा ७० सिटमध्ये २०११ मा ३१ सिट, २०१५ मा ६७ सिट र २०२० मा ६२ सिट जितेको केजरीवालको दलले यसपटक २२ सिटमा मात्र जित निकाल्यो । यो नतिजासँगै अहिले नेपालका नयाँ दललाई ‘प्रश्नमात्र हैन, काम गर’ शैलीको सुझाव ओइरिन थालेको छ । हुन त यसअघि नै विवेकशील साझाले नेपालका दललाई आम आदमीकोभन्दा पनि नमिठो पाठ सिकाइसकेको छ । तर अगुल्टो हानेको कुकुर बिजुली देख्दा तर्सिन्छ भन्ने नेपाली उखान चरितार्थ हुने खालको घटना हो दिल्लीको ।
राष्ट्रिय स्वतन्त्र पार्टी, जनमत पार्टी, नागरिक उन्मुक्तिजस्ता दल नेपालमा हालै उदाएका दल हुन् । माओवादी छाडेर नयाँ दल बनाउने कसरतमा रहेका डा. बाबुराम भट्टराई कसैगरी राजनीतिमा छाउन सकेका छैनन् । तर तीन नयाँ दलले भने आफ्नो आकार बढाउने प्रयास गरिरहेका छन् । यी तीनै दलको प्रयास पुराना शक्तिमाथि प्रहार गर्नु हो । भ्रष्टाचार, अनियमितता र दण्डहीनतामा डुबेका पुराना दलमाथि प्रश्न गरेकै कारण रास्वपा एकैपटक चौथो दलको रुपमा उदाएको हो । मधेसमा चरम जातीय राजनीति गरेका पुराना दललाई छाडेर जनमतमा प्रवेशको लहर पनि चल्यो । यता सुदूरपश्चिममा परम्परावादी दललाई छाडेर नागरिक उन्मुक्तिलाई रोज्यो जनताले । तर नागरिक उन्मुक्तिको परिवारवादको राजनीति छताछुल्ल भइसकेको छ । हरेक सरकारमा जाने रोग जनमतलाई लागिसकेको छ ।
सहकारी प्रकरणका कारण रास्वपा बदनाम भइसकेको छ । आफ्नो दलप्रति आलोचना रास्वपाका सांसदहरुले सहनै सकेका छैनन् । जसकारण हिजो आलोचना र प्रश्न गर्दै जन्मिएको रास्वपामाथि ती प्रश्न सोझिन थालेका छन् । राजनीति सेवा हो । तर जब मेनस्ट्रिम पोलिटिक्समा छिर्छ, कार्यकर्तामुखी राजनीतिमा लाग्छ, तब भ्रष्टाचारको चास्नीमा नेताहरु डुब्छन् । यसको मूल्यांकन जनताले अवश्य दिन्छन् नै । त्यसैले कार्यकर्ता पोस्ने हैन, देश र जनताको सेवामा काम गरौं । विवेकशील साझा र केजरीवालको हारबाट पाठ सिकौं ।
