मुलुकमा विकासका लागि राजनीतिमा युवा नेतृत्वको खोजी भइरहेको छ । शीर्ष दलहरुमा उमेर पाकिसकेका नेताहरुको रजगजले वाक्क जनताले युवा नेतृत्वको खोजी गरेका हुन् । तर दिनप्रतिदिन दलहरुको नेतृत्वमा प्रशासन वा विभिन्न पेशाबाट रिटायर भएकाहरु भर्ती हुने क्रम बढ्दो छ ।
यसका पछिल्लो उदाहरण हुन् पूर्वप्रहरी अतिरिक्त महानिरीक्षक (एआईजी) विश्वराज पोखरेलले । उनले राष्ट्रिय स्वतन्त्र पार्टीमा प्रवेश गरेर राजनीतिमा छाउने उद्घोष गरेका छन् । रिटायर प्रहरी अफिसरहरु यसअघि नेपाली कांग्रेस, नेकपा एमालेमा पनि प्रवेश गरेर मन्त्रीसम्म बने ।
यसरी रिटायर प्रवेश गर्ने प्रहरीमात्र हैनन्, कलाकार, पत्रकार, व्यवसायी पनि छन् । आफ्नो उर्बर समय पेशा व्यवसायमा लगाए पनि धेरैजसो सम्मान, शक्तिको लोभमा राजनीतिमा भर्ती हुन्छन् । कर्मचारी होस् या व्यवसायी आफू दलमा नपसुन्जेल चर्को प्रश्न गर्ने, आलोचना गर्ने, कुनै दलमा प्रवेश गर्न साथ फरक व्यवहारमा उत्रने रोग नै हो ।
यो पटकको निर्वाचनमा पनि धेरैजस्तो यसखाले पात्रहरु उम्मेदवार बन्दैछन् । दलहरुले पनि यस्तै रिटायरहरुलाई खोजेर भर्ती गर्ने क्रम बढ्दो छ । खासमा राजनीति सत्ताको प्रतिपक्ष हो । सत्ताले जनतालाई अनेकन दुःख दिनेगर्छन् । सेवाग्राहीको समयमा काम नहुने, अड्डाअदालतमा काम अड्काइदिने । सानो काममा पनि घुस खोज्ने । कुनै पनि काम बन्न आफ्नै मान्छे चाहिने । अनेकन बहाना बनाएर सेवाग्राहीलाई घुमाउने ।
सोझालाई फसाउन कानुनको गलत प्रयोग गर्ने काम सत्ताले गर्ने गर्छ । जसकारण यसको विरोधमा जसले आवाज उठाउँछ, जनताले उसैलाई साथ दिन्छ । प्रजातन्त्रको स्थापनापछि जनताले प्रजातान्त्रिक दलहरुलाई किन मन पराए ? यसको एउटै कारण हो सत्तामाथि ती दलका नेताहरुले खबरदारी गरेर ।
अहिलेको दलका चरित्र भने सत्तामा बसेर मह चाटेका, रिटाएर भएकाहरुलाई खोजीखोजी ल्याएर भर्ती गर्न थालेका छन् । यो भनेको सत्तासँग काँध मिलाउनु हो । यस्तो हुनु भनेको जनताको काम गर्न छाड्नु हो । त्यसैले जनताको प्रिय बन्ने हो भने रिटायरहरुलाई भित्र्याउने काममा दलहरु लाग्नुहुन्न ।
जसले जनताको पक्षमा काम गर्छ, जोसँग नीतिगत रुपमा देश विकासको खाका छ । जोसँग निहीत स्वार्थ छैन, यस्ता व्यक्तिलाई दलमा भित्र्याउनुपर्छ । निर्वाचनमा उम्मेदवार पनि यस्तै व्यक्तिहरुलाई बनाउनुपर्छ । अनिमात्र राजनीतिका मुल उद्देश्य पुरा हुन्छ र लोकतन्त्र फस्टिएर देशको विकास हुन्छ ।
