निर्वाचन आयोगले फागुन २१ गतेका लागि तोकिएको प्रतिनिधि सभाको निर्वाचनका लागि तयारी धमाधम गरिरहेको छ । तर बजेट अपुग हुँदा आयोगले असन्तुष्टि जनाइरहेको छ । आयोगले असन्तुष्टि जनाउनुको अर्को कारण हो प्रमुख निर्वाचन आयुक्तका रिक्तता । अहिले आयोग कार्यवाहकको भरमा चलिरहेको छ । कुनै पनि काम हुन कार्यकारीको आवश्यकता पर्दछ । कार्यवाहक प्रमुख निर्वाचन आयुक्त रामप्रसाद भण्डारीले निर्वाचन सम्पन्न गराउन कुनै कसर बाँकी राख्दैनन् भन्नेमा सबैलाई विश्वास पनि होला । तर उनै भण्डारीलाई कार्यकारी पद अर्थात् प्रमुख निर्वाचन आयुक्त बनाएमा अझ बढी उत्साहका साथ काम गर्न सक्छन् ।
अहिले शीर्ष दलमात्र हैन, निर्वाचनमा जाने गरी विद्रोह गरेका जेन–जी समूहले नै फागुन २१ गते तोकिएको निर्वाचनको विरोध गरिरहेका छन् । एक त राज्यले जेन–जी विद्रोहमा उत्रेकाहरुलाई कारबाही गरिरहेका छन् । उनीहरुलाई निर्वाचनमा सहभागी गराएर यो विद्रोह र परिवर्तनलाई संस्थागत गर्नुपर्ने सरकारको काँधमा जिम्मेवारी थियो । तर परिवर्तनमा रगत बगाएकाहरुलाई नै अहिले समाजमा अस्विकार गर्ने परिस्थिति सिर्जना हुँदैछ । जसकारण पनि जेन–जी अभियन्ताहरुले अन्तरिम सरकारका प्रधानमन्त्री सुशीला कार्की, गृहमन्त्री ओमप्रकाश अर्यालको कार्यक्षमतामाथि प्रश्न उठाउन थालेका हुन् ।
यो स्वभाविक पनि हो । अहिलेको सरकार, निर्वाचन आयोगमा दर्ता भएका दलहरुको अवस्था हेर्दा पुरानै दलले रजगज गर्ने पक्कापक्की देखिन्छ । यो अवस्था आउनु भनेको अर्को विद्रोह निम्त्याउनु पनि हो । देशलाई थप मुठभेड र थप क्षतिको बाटोमा लैजाने काम सत्ताको नेतृत्व गर्नेहरुले गर्न हुँदैन । भ्रष्टाचार र चरम नातावादमा डुबेको राजनीतिलाई बिदा गरेर नयाँ पुस्तालाई जिम्मेवारी दिने गरी वातावरण सिर्जना गर्नु शासनमा बस्नेहरुको दायित्व हो । यसमा बुद्धि र विवेक प्रयोग गर्न सक्नुपर्छ । भिडले जे भन्यो त्यही पत्याउने र त्यहीअनुसार काम गर्ने लोकप्रियतावादतिर रम्नु भोलिका लागि राम्रो होइन ।
त्यसैले जसरी नयाँ पुस्ताले प्रविधिमा सहयोग गर्नसाथ ८ लाख भन्दा बढीले मतदाता नामावलीमा नाम भरेका थिए, यो उत्साह मर्न दिन हुन्न । प्रवासबाट पनि मत हाल्न पाउने व्यवस्था गर्ने सरकारको तयारीले अझ उत्तिकै उत्साहित मतदातालाई पनि सरकारले निरुत्साहित पार्ने काम गर्न हुन्छ । यी विषयमा सम्बोधन गर्न सरकारले निर्वाचनको खर्च बढाउनुका साथै युवाहरुलाई पनि अट्ने ठाउँ बनाउँदै निर्वाचनको वातावरण निर्माणतिर ध्यान दिनु उपयुक्त हुनेछ ।
