पछिल्ला दिनमा धेरैजसो महिला हिंसा आफन्त र नजिककाबाटै हुने गरेको देखिएको छ । नेपाल प्रहरीको तथ्यांकले आफन्त र नाता पर्नेहरूबाटै महिला बढी हिंसामा पर्ने गरेका देखिएको हो । ९१ प्रतिशत यौनजन्य हिंसा आफन्त र नातेदारबाटै भएको पाइएको छ । पछिल्ला दिनमा हिंसाका घटना बढ्नुमा उजुरी बढ्नु पनि हो ।
हिंसाका विविध कारण हुन्छन् । नेपालमा बढीजसो गरिबी, परनिर्भरताका कारण पनि यस्ता घटनाहरु बढिरहेका छन् । कतिपयले अझ डरत्रासका कारण प्रहरीसम्म पुग्न सकिरहेका हुँदैनन् । महिला हिंसाबाट कुनै उमेर समूह अछुतो देखिन्न । नातागोताबाटै हिंसा हुनु झनै चुनौतीपूर्ण विषय हो ।
समाजमा अहिले पनि महिला हिंसाबारे उजुरी परेमा उजुरी दिने महिलामाथि नै दोष लगाउने चलन छ । महिला आफैं नै दोषी होला, उसको मञ्जुरीबिना यस्तो कसरी हुन्छ, पुरुषलाई फसाउन खोजेका होलान् । यस्तै खाले आरोप लगाएर महिलामाथि हतोत्साहीत वातावरण निर्माण गर्ने गरिन्छ ।
खासमा खुला समाजमा यौन हिंसाका घटना कम हुन्छ । नेपालमा यौन शिक्षा, यसबारे सानैबाट शिक्षा दिने कुरामा कन्जुस्याइ गरिन्छ । किनभने यो लाजको विषय हो । यस्तो विषयमा बालबालिका निकै उत्सुक हुन्छन् । उनीहरुलाई यस्तो शिक्षा दिनबाट बञ्चित गरिन्छ । जसका कारण पनि यसलाई लाजको विषय बनाइन्छ ।
समाजमा देखिएको अर्को समस्या हो, कुनै घटना भएमा मेलमिलाप गर्न दिइने दबाब । जसका कारण यो विषय कानुनीको कठघरासम्म पुग्न पाउँदैन । यसले पीडकहरुलाई बल मिल्छ । कानुनी कठघरामा पुगेकाहरुलाई पनि न्यायोचित तवरले सजाय नदिँदा पीडितहरु मुख लुकाएर हिँड्नुपर्ने अवस्था छ ।
यस्ता विषयहरु अब विस्तारै न्यूनीकरण गर्दै लैजानुपर्छ । कोही हिंसामा परे पहिले त आफैले सहनु भएन । अर्को अरु हिंसामा परेको देखे त्यसलाई बाहिर ल्याउने र हिंसाको विरोधमा बोल्नुपर्छ । अहिले यस्ता विषय सार्वजनिक गर्ने अनेकन माध्यमहरु आइसकेका छन् । लाज वा व्यक्तिगत जीवनमा आँच आउने भए अनुहार वा नाम सार्वजनिक नगरी पनि हिंसाका घटनालाई बाहिर ल्याउन सकिन्छ ।
हिंसा सहनु हुन्न । यो लुकाउनु पनि हुन्न । जति सकिन्छ यसलाई न्युनीकरण गर्न हिंसामा परेकाहरु नै बाहिर आउनुपर्छ । जसले गर्दा पीडकहरु सचेत हुनेदेखि सम्भावित घटनासमेत रोकिन्छ । त्यसैले आजैबाट महिला हिंसाविरुद्ध आवाज उठाऔं, न्यूनीकरणमा जोड दिऊ ।
