जेन-जी विद्रोहपछि दलहरुमा नेतृत्व फेर्ने माहोल शुरु भएको छ । सबैभन्दा ठुलो दल नेपाली कांग्रेस र नेकपा एमालेले निर्वाचनअघि नै महाधिवेशन गर्ने तयारी गरेको छ । नेकपा एमालेले यही मंसिरको २७ बाट महाधिवेशन शुरु गर्दैछ । यसका लागि एमालेले महाधिवेशन प्रतिनिधि छनोट करिबकरिब सकाइसकेको छ ।
नेपाली कांग्रेसले पुसको २६ मा १५ औं महाधिवेशन गर्ने कार्यतालिका सार्वजनिक गरेको छ । यसरी ठुला दलहरु एकैसाथ महाधिवेशनमा लागेको छ । जेन-जी आन्दोलनका क्रममा ठुला दलका कार्यालयहरु जले । नेताका घरहरु जले । यद्यपि दलहरु खरानीबाट उठ्न थालेका छन् । जेन-जी विद्रोहको पहिलो माग हो सुशासन ।
सुशासन दलभित्र पनि आवश्यक छ । दलको महाधिवेशन गर्नु पार्टीको पुनसंरचना गर्नु हो । यो भनेको पुरानो नेतृत्वले तय गरेको नीतिमा केही फेरबदल वा पुनर्तजगी गराउनु हो । ठुला दलले आफ्नै आसेपासेलाई नेतृत्वमा ल्याउने परम्परा पहिलेबाटै हो । जस्तो श्रीमान-श्रीमती नै दलको केन्द्रीय सदस्य, श्रीमान प्रत्यक्षमा निर्वाचित भए श्रीमती समानुपातिकमा बस्ने जस्ता आसेपासे पोस्ने व्यवस्था दलमा विद्यामान छ ।
यस्तो खालका व्यवस्थामा तुरुन्त सुधारको आवश्यकता छ । यसमा शीर्ष दलले पुनर्विचार गर्नु आवश्यक छ । नभए पुराना दलको विकल्पमा धमाधम नयाँ दल आउन थालेका छन् । मंगलबारमात्र धरानका मेयर हर्क साम्पाङले श्रमलाई मुल एजेन्डा बनाउँदै नयाँ दल घोषणा गरेका छन् । हर्कले झैं बुधबार ऊर्जामन्त्रीसमेत रहेका कुलमान घिसिङले आफ्नो दलको रोडम्याप सार्वजनिक गरेका छन् ।
कुलमानले जारी गरेको रोडम्याप नतिजामुखी राजनीति हो । यी दुई दलको आक्रामक प्रचार पुराना दलका लागि चुनौति हो । कांग्रेस एमालेलाई राजनीति नगर भनेको भने पक्कै हैन । सुधारका लागि प्रशस्त अवसर वैकल्पिक दलहरुले पुराना दललाई दिएका छन् । पुराना दलको गल्तीकै अवसर सदुपयोग गर्दै कुलमान हर्क उदाएका हुन् । काठमाडौं महानगरका मेयर बालेन्द्र साह पनि पुराना दललाई चुनौतिको विषय हो ।
जुनसुकै ठाउँमा भ्रष्टाचार पुराना दलकै कारण गाँजेको छ । दलहरुको मनपरीतन्त्रका कारण जनताको आक्रोश जेन-जी आन्दोलनमा पोखियो । यसैको सिर्जना हो वैकल्पिक दलहरु । यो पुराना दलको लागि सच्चिने अवसर पनि हो । सच्चिएन भने पुराना दलको सक्किने समय पनि हो यो । त्यसैले सुशासनमा आजै लागौ र भ्रष्टाचार अन्त्यलाई मुलमन्त्र बनाऊ ।
