प्रधानमन्त्री केपी शर्मा ओली मंसिर १७ गते चीन भ्रमणमा जाँदै छन् । चीन भ्रमणको एजेण्डा अहिलेसम्म टुंगो छैन । केही नभएपछि सरकारले अहिले जबरजस्ती बिआरआई परियोजनालाई चर्चामा ल्याएको छ । चिनियाँ चासो भन्दै प्रधानमन्त्री ओलीसहित वामपन्थी दल यो कार्यान्वयनमा अघि बढ्नुपर्ने भन्दै एक कदम अघि सरेको देखिन्छ भने नेपाली कांग्रेस ठीक यसको विपरीत उभिएको सुनिन्छ ।
यद्यपि केही हुन्न भनेर बाहिर ‘फेस सेभिङ’ गर्दै हिँडेका कांग्रेस नेताहरुले नै बिआरआई कार्यान्वयनका लागि चिनियाँ पक्षबाट मस्यौदा आइसकेको खुलासा गरेका छन् । कांग्रेसका प्रवक्ता डा. प्रकाशशरण महतले यसबारे बुधबार एक कार्यक्रममा खुलासा गरेपछि यो विषयले थप चर्चा पाएको हो । यद्यपि, प्रधानमन्त्री ओली आफैं भने बिआरआई परियोजना अघि बढ्ने पक्षमा देखिन्नन् । चीनको बृहत् चासोसहितको यो परियोजनालाई नेपाली पक्षले भने रेल ल्याउने विषयको रुपमा मात्र बुझेको छ ।
द्विपक्षीय सम्झौताका लागि केही विषय नभएको र भारतले निम्तो नदिएको झोकमा प्रधानमन्त्री चीन जान लागेको भन्ने चर्चा सर्वत्र छ । यो भ्रमणमा ओलीले आफूसँग ३९ जना सरकारी खर्चमा चीन लाँदै छन् । यो टोलीमा प्रधानमन्त्री पत्नी राधिका शाक्य, परराष्ट्रमन्त्री आरजु राणा देउवा, प्रधानमन्त्रीका मुख्य सल्लाहकार विष्णु रिमाल, आर्थिक सल्लाहकार युवराज खतिवडा अटेका छन् । यसैगरी कांग्रेसदेखि अरु पार्टीका सांसदहरु पनि यो टीलीमा अटाइएको छ । सांसद अर्जुन नरसिंह केसी, श्यामकुमार घिमिरे, लिलानाथ श्रेष्ठ, बिजुला रायमाझी, रेखा शर्मा, वीरेन्द्रप्रसाद महतो, दीपक कार्की, सर्वेन्द्र नाथ शुक्ला, रञ्जिता श्रेष्ठ, मुख्यसचिव एकनारायण अर्याल, सचिवहरू रामप्रसाद घिमिरे, अमृतबहादुर राई (परराष्ट्र कामुसचिव) पनि टोलीमा छन् ।
यसैगरी लगानी बोर्डका प्रमुख कार्यकारी अधिकृत (सिइओ) सुशील ज्ञवाली, मदन भण्डारी विज्ञान तथा प्रविधि विश्वविद्यालयका सहप्राध्यापक पद्मसुन्दर जोशी, प्रधानमन्त्रीका निजी चिकित्सक दिव्यासिंह शाह, प्रमुख स्वकीय सचिव राजेश बज्राचार्यसहित अन्य सरकारी अधिकारीहरू कृष्णप्रसाद ढकाल, विष्णुप्रसाद गौतम, मणिरत्न शर्मा, उदय पोखरेल, कमल रावल, ऋचा भट्टराई, जानकी ओझा, सुजन लामिछाने, विनोद खनाल, जयश्री शाक्य र अनिता सिंह रहने छन् ।
यता निजी क्षेत्रबाट ४८ जना यो भ्रमणका लागि चीन जाँदै छन् । प्रधानमन्त्रीले भने यति धेरै जनाको लावालस्कर भ्रमण निस्कने भएपछि बिदाइ कार्यक्रममा धेरै उपस्थित नहुन निर्देशन दिएका छन् । आफैं लावालस्कर लिएर चीन निस्कँदा यस्तो निर्देशन किन, लाज छोप्न ?
