काठमाडौं– नेपाल वैदेशिक रोजगार संघ (नाफिया)ले नेपालीहरुको रोजगारीका लागि उदाउँदो श्रम गन्तव्यका रुपमा रहेका पश्चिमी बाल्कन्स् राष्ट्रहरुमा अवसरको खोजी गर्ने भएको छ । यसका लागि भर्खरै पूर्वी युरोपेली मुलुक कोसोभोको राजधानी प्रिस्टिनामा आयोजना गरिएको ‘फेयर रिक्र्युटमेन्ट फर माइग्रेन्ट वर्कर्स’ कार्यक्रममा संघले सहभागिता जनाएको छ । उक्त कार्यक्रम जिआइजेड, आइएलओ कोसोभो र जर्मन कोअपरेसनले आयोजना गरेको बताइएको छ ।
बाल्कन्स् मुलुकहरुमा आप्रवासी कामदारको चाप नबढ्दै समयमै कसरी नेपालको कामदार भर्ना प्रक्रियालाई सरोकारवालासम्म पुर्याउने भन्नेबारे सोचिरहेको अवस्थामा उक्त कार्यक्रममा सहभागी हुन र आफ्ना कुरा राख्न पाउनु उपयुक्त अवसर रहेको संघका अध्यक्ष राजेन्द्र भण्डारीले बताए । ‘बाल्कन्स् क्षेत्रमा कामदार भर्ना प्रक्रियामा अन्योलता देखिएको, रिसिभिङ र सेण्डिङ मुलुकहरुको आप्रवासन नीति र पक्रिया एक अर्काले नबुझेको कारण गैरव्यवसायीमार्फत कामदार भित्रिएको अवस्थालाई बुझाउने मौका पायौं,’ उनले भने ।
उक्त कार्यक्रममा नेपाली आप्रवासी कामदारको हकअधिकार सुनिश्चित गर्न र रोजगार भर्ना प्रक्रियालाई सहज बनाउन कसले, कहाँ र कस्तो भूमिका खेल्नुपर्छ भन्ने विषयलाई अन्तर्राष्ट्रिय संयोजकको जिम्मेवारीमा रहेका संघका प्रथम उपाध्यक्ष डिकबहादुर खत्रीले प्रस्तुति दिएका थिए । युरोपको नयाँ गन्तव्यमा नेपाली श्रमिकले पाउने अवसर र व्यहोर्नुपर्ने चुनौतीका बारेमा निकै राम्रो र तथ्यगत प्रस्तुति दिएको अध्यक्ष भण्डारीले बताए ।
‘संघको अध्यक्षको हैसियतमा प्यानलिस्टको भूमिकामा रहेर अबको युरोपको गन्तव्यलाई सफल बनाउन दुवैतर्फबाट खेल्नुपर्ने भूमिका निर्वाह गर्दै सरकारी तवरबाट हुने द्विपक्षीय सम्झौता/ समझदारी लगायतका विषयलाई जोडदार उठाउने अवसर प्राप्त भयो,’ उनले भने । यो सम्मेलनमा संघको सहभागिता आगामी दिनमा महत्वपूर्ण सावित हुने अध्यक्ष भण्डारीले बताए । यस्तै सम्मेलनमा उठेका विषयहरुका सन्दर्भमा नेपाल सरकारका सम्बन्धित निकायसँग छलफल गरी निष्कर्षमा पु¥याउन सक्दो प्रयास गरिने उनले जानकारी दिए ।
