गत भदौ ३१ गते प्रतिनिधिसभाको चौथो अधिवेशन अन्त्य भयो । त्यसयता दसैंतिहार, छठलगायत मुख्य चाडपर्व सकियो तर प्रतिनिधिसभा हिउँदे अधिवेशनका लागि चालचुल नगरी बसेको छ । सभामुख देवराज घिमिरे कम्बोडियातिर उडेका छन् भने संसद्का सचिव सुरेश अधिकारीले राजीनामा दिएका छन् । विधेयक अधिवेशनको नामले चिनिएको संसद्मा यसपटक थुप्रे विधेयक आउने तयारीमा छ । प्रतिनिधिसभामा महŒवपूर्ण मानिने विधेयकहरु यसपटक संसदीय समिति हुँदै आउनुपर्ने हो ।
तर ‘मिनी संसद्’ का रुपमा चिनिएको संसदीय समिति नै विभिन्न बहानामा बस्न सकेको छैन । प्रतिनिधिसभामा हाल १० वटा संसदीय समिति छन् । तिनमा १५ विधेयक अड्किएका छन् । भ्रष्टाचार निवारण (पहिलो संशोधन), निर्माणमुखी सामग्री (व्यवस्थापन तथा नियमन) र संघीय निजामती सेवा विधेयक अड्किएका छन् । पारदर्शी शासनसत्ता र संघीय प्रणालीअनुरुपमा शासनका लागि टड्कारो कानुनहरु अझै नबन्दा संघीयताप्रति वितृष्णा बढ्दो छ ।
तर सांसदहरु भने दुई महिनादेखि तलब बोनस लिएर भ्याकेसनमा छन् । सभामुख घिमिरेले संसदीय समितिको बारेमा चासो राख्दा समितिका सभापतिहरुले सांसद नै नभेटिने बताएका छन् । सांसदहरु पार्टीको कार्यक्रममा जिल्ला खटिने, उपनिर्वाचनका लागि खटिनेजस्ता कारण देखाउँदै समितिको बैठक बस्न सकेको छैन ।
जनताको आवाज बुलन्द गर्नुपर्ने सदन अहिले सरकारले सञ्चालन गर्न सकेको छैन । एकातिर राष्ट्रिय स्वतन्त्र पार्टीका सभापति रवि लामिछाने हिरासतमा छन् जुनसुकै बेला विशेष अधिवेशन बोलाउन सक्छु भन्दै भाषणबाजीमा उत्रिएका माओवादी केन्द्रका अध्यक्ष पुष्पकमल दाहाल पनि मौन छन् । विपक्षी दल बलियो छ भनेर सडकमा शक्ति प्रदर्शन गर्ने नेता दाहालको शक्ति प्रदर्शनको जवाफ प्रधानमन्त्री केपी शर्मा ओलीले सडकबाटै फर्काइसके । सत्तारुढ अर्को ठूलो दल नेपाली कांग्रेस जसले संसदीय शक्तिमा विश्वास गर्छ, ऊ पनि यतिबेला मौन छ ।
संसद्को अधिवेशन बोलाउने जिम्मेवारी सभामुख घिमिरेको हो, तर उनी दलको सहमतिविना अघि बढ्न सक्दैनन् । जसका कारण जनताको समस्या र मागहरु घन्कनुपर्ने संसद् अहिले बन्द छ । कुनै शक्तिको डरत्रासका कारण सरकारले नै संसद् अमूक व्यक्तिको बन्दकी बनाउन हुँदैन । अहिले हवाई भाडा चर्किनुका साथै महँगी र बेरोजगारी समस्याले जनता अक्रान्त छन् । बाढीपहिरोपीडित चिसोमा कठ्यांग्रिन थालेका छन् । तिनको आवाजलाई मुखरित गर्ने थलो खुला गर्न सांसदहरुले पनि दबाब दिनुपर्छ, यसरी हाइसञ्चो मानेर बस्ने हैन ।
