काठमाडौं– नेकपा एमालेमा केपी शर्मा ओलीको ‘बा’ प्रवृत्ति झांगिँदो नै छ । यही बा प्रवृत्तिका कारण ‘केपी बा’ पार्टीको मन्त्रजस्तै बनिसक्यो । १०औं महाधिवेशनमा आफूविरुद्ध अध्यक्षका प्रत्यासी बनेका भीम रावललाई ओलीले लगभग किनारा लगाइसकेका छन् । पार्टीको उपाध्यक्षसम्म बनेर उदाएका उनले २०७९ को निर्वाचनमा ओलीको बाहुलीबाट टिकटसमेत पाएनन् ।
उनै रावललाई कुनै बेला ओलीले केन्द्रीय सदस्य अफर भने नगरेका होइनन् । रावल उक्त पद ‘रिजेक्ट’ गरेर गुमनाम छन् । पछिल्लो दिन असोज २५ गते एमाले अध्यक्ष ओलीले कीर्तिपुरको मैत्रीनगरमा आफ्नो केन्द्रीय कार्यालयको शिलान्यास गरे । त्यो पनि भाटभटेनीका मालिक मीनबहादुर गुरुङ साक्षी राखेर । गुरुङले नै दान दिएको १० रोपनी १४ आनामा भवन बन्ने भएपछि पार्टीभित्रै यसको आलोचना सुरू भयो । आलोचना थालिन् स्थायी कमिटी सदस्य बिन्दा पाण्डेले । त्यसपछि केन्द्रीय सदस्य उषाकिरण तिम्सेनाले ओलीको कदमको विरोध गरिन् ।
उहाँहरूले के कति कारणले त्यसप्रकारका गतिविधि गरिराख्नुभएको छ भन्ने विषयमा स्पष्टीकरण सोध्ने निर्णय भएको छ ।
शंकर पोखरेल
महासचिव, नेकपा एमाले
पार्टीमा महासचिव शंकर पोखरेल, पार्टी प्रचार विभाग प्रमुख राजेन्द्र गौतमले उनीहरुको भनाइको खण्डन गरे । त्यसपछि किनारा लगाइएको रावलले पनि ओलीको कदमको विरोध गरे । त्यसपछि भने ओलीले सचिवालय बैठक डाके । आइतबार एमालेको मुख्यालय च्यासलमा बसेको उक्त बैठक एउटै विषयमा केन्द्रित रह्यो । त्यो हो, पार्टीले जग्गा दान पाउँदा त्यसविरुद्ध बोल्ने नेताहरुलाई के गर्ने ? सचिवालय सदस्यबीच लामो छलफलपछि तीनै जना नेतालाई स्पष्टीकरण सोध्ने निर्णय भएको एमाले महासचिव शंकर पोखरेलले बताए ।
‘पार्टी स्थायी कमिटी सदस्य बिन्दा पाण्डे, पार्टी केन्द्रीय सदस्य उषाकिरण तिम्सिनाले पार्टी निर्णयविपरीत सार्वजनिक अभिव्यक्ति दिनुभएकोमा उहाँहरूले के कति कारणले त्यसप्रकारका गतिविधि गरिराख्नुभएको छ भन्ने विषयमा स्पष्टीकरण सोध्ने निर्णय भएको छ,’ उनले भने ।त्यतिमात्र हैन एमालेले रावललाई पनि स्पष्टीकरण सोध्ने भएको छ । ‘त्यसैगरी लामो समय पार्टी नीतिसँग असहमत राखी आफ्नो विचार राख्नुभएका पार्टीका पूर्वउपाध्यक्ष भीम रावललाई पनि पार्टीका तर्फबाट स्पष्टीकरण सोध्ने भएको छ,’ पोखरेलले भने ।
व्यवसायी गुरूङले दान दिएको भनिएको कीर्तिपुर नगरपालिका–२ स्थित मैत्रीनगरको १० रोपनी १४ आना जग्गामा प्रधानमन्त्रीसमेत रहेका पार्टी अध्यक्ष ओलीले भवनको शिलान्यास गरेका थिए । त्यसप्रति असहमति राख्दै पाण्डेले उक्त कदमले २८ लाख मतदाताको अपमान भएको पनि बताएकी थिइन् ।‘साढे पाँच लाख पार्टी सदस्यको स्वाभिमानी शिर झुकाउने र २८ लाख मतदाताको अपमान गर्ने कदम हो यो । व्यापार व्यवसाय गर्नेले पारदर्शीरूपमा कम्पनीको सामाजिक दायित्वअन्तर्गत सामाजिक काममा सहयोग गर्नु कर्तव्य नै हो । तर, राजनीतिक दलले कार्यालय बनाउन यस्तो सहयोग लिनु र व्यापारीले दिनु दुवै गलत हो ।
अहिले पार्टीलाई आवश्यकता पर्दा लाखौं होइन, करोडौं बोकेर आउनेहरु भेटिन थालेका छन् । तर, बुझ्नुपर्छ जसले लाख दिन्छ, करोडको अपेक्षा राखेको हुन्छ । जसले करोड दिन्छ उसले अर्ब फिर्ता गर्ने सोच राखेकै हुन्छ ।
बिन्दा पाण्डे
स्थायी कमिटी सदस्य, एमाले
दिनेले किन र कसरी दिए उनैलाई थाहा होला । तर, स्वीकार गर्नेले पार्टीको निर्णायक तहमा छलफल र निर्णय त परको कुरा जानकारीसमेत नहुनेगरी गरिएको यो निर्णय दीर्घकालमा आत्मघाती सावित हुने छ । समय घर्की सकेको छैन । मनमोहन र मदनहरूले उँचो बनाएको पार्टीको इतिहास, वर्तमानमा बाँचेका स्वाभिमानी पार्टी पंक्ति र भावी सन्ततिका लागि एमालेको गौरव जोगाउने हो भने यो गलत निर्णय सच्याउनैपर्छ । समयमै सोचौं,’ उनले भनेकी थिइन् । केन्द्रीय सदस्य तिम्सेनाले पनि व्यवसायीबाट दान लिएर पार्टी कार्यालय उभ्याउनु गम्भीर गल्ती भएको बताएकी थिइन् ।
‘एक्लै भए पनि सत्यको पक्षमा उभिने’
पार्टीले स्पष्टीकरण सोध्ने निर्णयपछि केन्द्रीय सदस्य उषाकिरणले पाण्डेसँगैको फोटो राखेर सामाजिक सञ्जालमा एक्लै भए पनि सत्यको पक्षमा उभिनुपर्ने भन्दै गौतम बुद्धको भनाइ सेयर गरेकी छन् । ‘एक्लै भए पनि सत्यको पक्षमा उभिनुपर्दछ– गौतम बुद्ध’ उनले फेसबुकमा लेखेकी छन् ।
यसैगरी बिन्दाले भने किताबको अंश सार्वजनिक गर्दै परिवर्तनका वाहक श्रमजीवी जनता भएको बताएकी छन् । ‘अहिले पार्टीलाई आवश्यकता पर्दा लाखौं होइन, करोडौं बोकेर आउनेहरु भेटिन थालेका छन् । तर, बुझ्नुपर्छ जसले लाख दिन्छ, करोडको अपेक्षा राखेको हुन्छ । जसले करोड दिन्छ उसले अर्ब फिर्ता गर्ने सोच राखेकै हुन्छ,’ पाण्डेले सार्वजनिक गरेको किताबको अंशमा लेखिएको छ ।
पछिल्लो समय एमालेमा ओलीको निरंकुशता बढ्दा नेताहरु बोल्न डराइरहेका छन् । जसकारण वामदेव गौतमसमेत अहिले एमालेको राजनीतिबाट किनारा लागेका छन् ।
