हालै आएको बाढीपहिरोको विपद् सेलाएको छैन । चाडबाडको मुखैमा आएको अविरल वर्षापछि आएको बाढीपहिरोजन्य विपद्ले जनधनको ठूलो क्षति पुर्यायो । काठमाडौं उपत्यकासहित बागमती प्रदेशमा धेरै क्षति पुर्याएको बाढीपहिरोबाट मधेस र कोशी प्रदेशका केही जिल्लालाई पनि प्रभावित बनायो ।
मुख्य राजमार्गहरु क्षतिग्रस्त हुँदा राजधानीबाट चाडबाड मनाउन बाहिरिनेहरुले सास्ती बेहोर्नुपरिरहेको छ । यता बाढीले घर भत्किए÷बगाएका पीडितहरु अस्थायी आवासमा कठिन संघर्ष गर्न बाध्य छन् । उनीहरु सरकारबाट पुनःस्थापनाको पर्खाइमा छन् । बस्न मिल्ने घर भएका बाढीपीडितहरु भने सफाइ गरेर पुनः सोही घरमा बसाइँ व्यवस्थापनमा जुटिरहेका छन् ।
यहीबीच बाढीप्रभावितहरुमाझ महामारीजन्य रोगको संक्रमण फैलिने जोखिम बढेको छ । बाढीमा डुबेर धेरै पशु चौपाया मरेका छन् । त्यही कारण अहिले प्रभावित क्षेत्र दुर्गन्धित बनेको छ । जसले महामारीजन्य रोग फैलाउने चिन्ता थपेको छ । यद्यपि, अहिलेसम्म कुनै रोगको महामारी फैलिइसकेको छैन । यो सुखद् पक्ष हो । तर, महामारीको उच्च जोखिम रहेको चिकित्सकहरु बताउँछन् । विपद्ले पानीका स्रोतहरू प्रदूषित हुने हुँदा महामारीजन्य रोगको सम्भावना अधिक रहने र यस्तो अवस्थामा सबैले सतर्कता अपनाउन जरुरी रहेको उनीहरुको भनाइ छ ।
शुक्रराज ट्रपिकल तथा सरुवारोग अस्पतालका प्रमुख कन्सल्ट्यान्ट फिजिसियन डा. विमल चालिसेका अनुसार विपद्पश्चात् महामारीजन्य रोगबाट संक्रमित बिरामीहरू भेटिएका छैनन् । यद्यपि, महामारीजन्य रोग बढ्न सक्नेतर्फ सचेत रहँदै उपचारका लागि तयारीमा रहेको उनको भनाइ छ । विपद्पछि पानीजन्य तथा कीटजन्य रोगहरू बढ्ने हुन्छ ।
खानेपानीको स्रोत दूषित हुँदा पखाला, हेपाटाइटिस र स्क्रब टाइफसको संक्रमण हुने सम्भावना रहन्छ । त्यसकारण यस्तो बेला उच्च सतर्कता आवश्यक हुन्छ । साथै, लामखुट्टेको टोकाइ, सर्पदंशको घटना पनि बढ्ने सम्भावना रहेकाले आवश्यक सावधानी अपनाउने, व्यक्तिगत सरसफाइमा विशेष ध्यान दिने, खानेपानीको शुद्धता ख्याल गरेर प्रयोग गर्ने, तरकारीलगायत फलफूलहरू राम्ररी सफा गरेर मात्र प्रयोग गर्नेबारे सबैले ध्यान दिनुपर्नेमा डा. चालिसेको जोड छ ।
बाढीपहिरोको विपद्बाट पिल्सिएका सर्वसाधारणलाई थप स्वास्थ्य समस्यामा पर्नबाट जोगाउन सरकारले आवश्यक कदम चाल्न जरुरी छ । विपद्बाट ज्यान जोगिएकाहरुको जीवारक्षा गरी अभिभावकीय दायित्व निर्वाह गर्नु आजको आवश्यकता हो । त्यसैले सरकारले बाढी प्रभावित क्षेत्रमा महामारीजन्य रोगको संक्रमण नियन्त्रणमा प्रभावकारी काम गनुपर्छ । अन्यथा, महामारीबाट जनताले फेरि अकालमा ज्यान गुमाउनुपर्ने अवस्था सिर्जना नहोला भन्न सकिन्न । यसलाई रोक्न तत्काल कदम चालियोस् । यो काम संघीय सरकारको मात्र नभई प्रदेश र स्थानीय सरकारकोसमेत जिम्मेवारी हो । प्रदेश र स्थानीय तह यो मामिलामा चुपचाप बस्न मिल्दैन ।
