नेपाली सेनाको कमाण्ड प्रधानसेनापति अशोकराज सिग्देलले सम्हालेका छन् । मुलुकको प्रमुख सुरक्षा संगठन नेपाली सेनाको ४५औं प्रधानसेनापतिका रूपमा सिग्देलले सोमबारदेखि औपचारिकरूपमा सेनाको कमाण्ड सम्हालेका हुन् । सोमबार राष्ट्रपति एवं नेपाली सेनाका परमाधिपति रामचन्द्र पौडेलसमक्ष पद तथा गोपनीयताको शपथ लिएर जंगी अड्डामा उनले आफ्नो पदबहाली गरे ।
सेनाका वरिष्ठतम् रथीका हैसियतले बलाधिकृतरथी सिग्देललाई सरकारले यसअघि कायममुकायम प्रधानसेनापतिको जिम्मेवारी प्रदान गरेअनुरुप गत साउन २५ गतेदेखि सो जिम्मेवारी सम्हाल्दै आएका थिए । प्रधानसेनापति सिग्देलले स्वदेश तथा विदेशबाट व्यावसायिक सैन्य शिक्षा हासिल गरेका छन् । आर्मी कमाण्ड एण्ड स्टाफ कलेज शिवपुरी र चीनको नेसनल डिफेन्स युनिभर्सिटीबाट स्नातक उनले आर्मी वार कलेजमा हायर कमाण्ड एन्ड म्यानेजमेन्ट कोर्स र भारतबाट डिफेन्स म्यानेजमेन्ट कोर्स पूरा गरेका छन् ।
राष्ट्रिय र अन्तर्राष्ट्रियस्तरका विभिन्न कार्यशाला र व्यावसायिक सेमिनारमा भाग लिएका प्रधानसेनापति सिग्देलले त्रिभुवन विश्वविद्यालय र चीनको राष्ट्रिय रक्षा विश्वविद्यालयबाट रणनीतिक अध्ययनमा स्नातकोत्तर उपाधि हासिल गरेका छन् । ३८ वर्षको सैन्य जीवनमा उनीसँग काउन्टर इन्सर्जेन्सी र जंगल वारफेयर स्कुलको कमाण्डेन्ट, इन्फन्ट्री ब्रिगेड र डिभिजनको कमाण्ड गरेको अनुभव छ । यस हिसाबले सेनाले एक अनुभवी नेतृत्व पाएको छ ।
नेपालको संविधानले सेनालाई नेपालको स्वतन्त्रता, सार्वभौमसत्ता, भौगोलिक अखण्डता, स्वाधीनता र राष्ट्रिय एकताको रक्षा गर्ने महŒवपूर्ण जिम्मेवारी दिएको छ । यसका अलवा विपद् व्यवस्थापन, राष्ट्र विकास, शान्ति स्थापना, आन्तरिक सुरक्षा, वन तथा पर्यावरण सुरक्षा, ऐतिहासिक धरोहरको संरक्षण, राष्ट्रिय एकताको प्रवर्द्धन र आपत्कालीन खोज तथा उद्धारका कार्य पनि सेनाको जिम्मेवारी क्षेत्रमा रहेको छ । नेपाली सेनाले अन्तर्राष्ट्रिय शान्ति स्थापना कार्यमासमेत विशिष्ट योगदान पु¥याउँदै आएको छ । हाल विश्वका विभिन्न द्वन्द्वग्रस्त राष्ट्रमा स्थापना भएका ११ मिसनमा ६७५ महिलासहित पाँच हजार ९१६ नेपाली सैनिक कार्यरत छन् ।
मुलुकमा राजनीतिक हस्तक्षेपबाट अहिलेसम्म बचेको कुनै संस्था छ भने त्यो नेपाली सेना हो । शान्ति प्रक्रियापछि तत्कालीन विद्रोही नेकपा माओवादीका लडाकुहरुलाई समायोजन गर्दा सेनामा राजनीति घुस्ने र विद्रोहको अवस्था आउनसक्ने भन्दै विरोध नभएको होइन । तर, समायोजनपछि पनि सेनाले आफ्नो गौरवमय पहिचानलाई जोगाइराख्न सफल भएको छ । यद्यपि, बेलाबेलामा यो संस्थालाई विवादमा तान्ने काम हुँदै आएको छ ।
पछिल्लो समय भने विकास निर्माण कार्यको जिम्मा दिएर सेनालाई ‘ठेकेदार’ बनाएको आरोप लाग्दै आएको छ । विशेषगरी काठमाडौं–तराई द्रुतमार्ग (फास्टट्र्याक) निर्माणको जिम्मा पाएको सेनामाथि समयमा काम नगरेको, जथाभावी ठेक्का लगाएको आरोप लाग्दै आएको छ । विभिन्न विकट क्षेत्रमा सडक निर्माणमा सेनाले निभाएको भूमिकाका लागि भने सेनाको प्रशंसा हुँदै आएको छ ।
यस्तो पृष्ठभूमिमा सेनाको कमाण्ड सम्हालेका सिग्देलले यस संस्थाप्रतिको जनविश्वास अझ बढाउन भूमिका खेल्ने अपेक्षा गर्न सकिन्छ । आफ्नो अनुभव, सीप र ज्ञानको उपयोग गर्दै नेपाली सेनाको गरिमा अझ उच्च बनाउन प्रधानसेनापति सिग्देललाई सफलता मिलोस् । कार्यकाल सफलताको शुभकामना !!
