सरकार परिवर्तनसँगै सकारात्मक बनेको सेयरबजार पछिल्लो समय उच्च अंकले बढिरहेको छ । नेपाल राष्ट्र बैंकले चालु आर्थिक वर्षको मौद्रिक नीतिमा खुकुलो व्यवस्था गरिदिएपछि सेयरबजारमा निरन्तर उछाल आइरहेको छ । बुधबार नेपाल स्टक एक्सचेञ्ज (नेप्से) परिसूचक ६४.२५ अंकले बढ्दा कारोबार रकममा नयाँ कीर्तिमान नै कायम भएको छ । बुधबार २१ अर्ब ९१ करोड १५ लाख तीन हजार रुपैयाँबराबरको सेयर किनबेच हुँदा नयाँ ‘रेकर्ड’ बनेको हो । बिहीबार भने नेप्से परिसूचक ५.२९ अंकले घट्न पुगेको छ । कारोबार रकम पनि २१ अर्ब ७१ करोड ३४ लाख ३१ हजार रुपैयाँमा खुम्चिएको छ ।
गत शुक्रबार (१२ साउन) सार्वजनिक मौद्रिक नीतिमा संस्थागततर्फको सेयर धितो कर्जामा यसअघि लगाइएको २० करोड रुपैयाँको सीमा हटाइएको छ । यसरी खुकुलो मौद्रिक नीति आएसँगै सेयरबजारमा उछाल देखिएको हो । यसले सेयरबजारमा लगानी गरेकाहरुमा उत्साह जगाएको छ । किनकि, लामो समयदेखि सेयरबजार बढ्न सकिरहेको थिएन । जसकारण लगानीकर्ताहरु निराश बनिरहेको अवस्था थियो । लामो समयदेखिको प्रतीक्षामा रहेका उनीहरु अहिले उत्साहित भएका हुन् ।
सेयर कारोबारबाट नाफा आर्जन गर्न धैर्यता चाहिन्छ । हतारमा निर्णय गरेर किनबेच गर्दा ठूलो नोक्सानी बेहोर्नुपर्छ । बजार के कारणले बढिरहेको छ र आगामी दिनमा कता जाँदै छ भन्ने नबुझी हल्लाको भरमा लाग्नु घातक हुनसक्छ । त्यसैले सेयरबजारका विज्ञहरुको प्राविधिक विश्लेषण र सल्लाहअनुसार निर्णय लिनु अति महŒवपूर्ण हुन्छ । सेयरमा लगानी गरेर चाँडै नाफा आर्जन गर्न सकिन्छ, जुन अन्य क्षेत्रबाट सम्भव हुँदैन । तर, यो यत्तिकै जोखिमपूर्ण पनि हुन्छ । त्यसैले सेयरमा लगानी गर्नु भनेको जुवा खेल्नुसरह भनिएको हो । जुवामा कहिले जितिन्छ त कहिले क्षणभरमै करोडौं रकम सकाइन्छ । हो, सेयर कारोबारमा पनि त्यस्तै हो । सुझबुझका साथ कारोबार गर्नेले मात्रै फाइदा लिनसक्छ ।
सबैभन्दा जोखिम त सेयरबजार नै कब्जा गरेर बसेका दलाली समूहबाट हुन्छ । त्यस्ता समूहले सेयरबजारमा ठूलो चलखेल गरिरहेका हुन्छन् । एउटा समूहको सेयर मूल्य अस्वाभाविकरुपमा बढाएर नाफा बुक गर्ने अनि अर्को समूहतर्फ लाग्ने चलखेलको चंगुलमा सोझा लगानीकर्ता पर्ने गरेका छन् । त्यसैले यसतर्फ सधैं चनाखो हुनु जरुरी छ । अहिले सेयरबजार बढ्नुको कारण अर्थमन्त्री विष्णु पौडेललाई पनि लिने गरिएको छ ।
उनी हरेकपटक अर्थमन्त्री बन्दा सेयबजार सकारात्मक बन्ने गरेको छ । यसमा उनको के जादू छ, त्यो पुष्टि हुन सकेको छैन । मौद्रिक नीतिलेचाहिँ सहजीकरण गरेकै हो । यद्यपि, बिहीबारको दुई हजार ७५५.६२ बिन्दुबाट नेप्से कुन बिन्दुसम्म पुग्छ भन्ने अनिश्चित छ । हुन त जोखिमविनाको लगानी केहीमा पनि हुँदैन । त्यसो भन्दैमा हचुवाको भरमा लगानी गर्ने होइन । धैर्य र सतर्क भएर लगानी गर्नु नै बुद्धिमानी ।
