नेपाल राष्ट्र बैंकले अपेक्षाकृत रुपमा लचिलो मौद्रिक नीति ल्याएसँगै निजी क्षेत्रले राहत महसुस गरेका छन् । राष्ट्र बैंकले शुक्रबार सार्वजनिक गरेको चालु आर्थिक वर्ष २०८१÷८२ को मौद्रिक नीतिले संकटमा फसेको अर्थतन्त्रलाई गतिशील बनाउन भूमिका खेल्ने आशा जगाएको छ । अर्थतन्त्रलाई गतिशील बनाउन सजगतापूर्ण लचिलो मौद्रिक नीतिको कार्यदिशालाई निरन्तरता दिइएको राष्ट्र बैंकको भनाइ छ । नयाँ मौद्रिक नीतिको निजी क्षेत्रले पनि स्वागत गरेको छ । यसले गर्दा पनि मौद्रिक नीति सकारात्मक सन्देश प्रवाह गर्न सफल भएको मान्न सकिन्छ ।
अहिले संसद्का दुई ठूला दल नेपाली कांग्रेस र नेकपा एमालेको गठबन्धन सरकार छ । एमाले अध्यक्ष केपी शर्मा ओली प्रधानमन्त्री छन् । राष्ट्र बैंकका गभर्नर महाप्रसाद अधिकारी प्रधानमन्त्री ओलीनिकट हुन् । अर्थमन्त्री एमालेकै विष्णु पौडेल छन् । यही कारण सरकार र राष्ट्र बैंकबीचको ट्युनिङ मिल्न गएको छ । जुन मौद्रिक नीतिमा झल्किन्छ । किनकि विगतामा राष्ट्र बैंक र सरकारबीच आन्तरिका द्वन्द्व चल्ने गरेको थियो । सरकारले ल्याएको बजेट कार्यान्वयनलाई सहज बनाउनेगरी मौद्रिक नीति नआउँदा त्यस्तो समस्या आउने गरेका उदाहरण ताजै छ । यसपटक त्यस्तो समस्या देखिएन । बजेट कार्यान्वयनमा सहजीकरण हुने गरी मौद्रिक नीति आएको छ ।
मौद्रिक नीतिले समष्टिगत आर्थिक स्थायित्व कायम राख्दै आर्थिक क्रियाकलाप विस्तारमा सहयोग पु¥याउँदछ । देशको केन्द्रीय बैंकले यो नीति तर्जुमा गर्दछ । मौद्रिक नीतिले मुद्रा प्रदाय, कर्जा र ब्याजदरको व्यवस्थापनमार्फत आर्थिक स्थायित्व कायम राख्दै आर्थिक वृद्धि तथा रोजगारी सिर्जनामा सहयोग पु¥याउने उद्देश्य राखेको हुन्छ । जसले गर्दा अर्थतन्त्रलाई क्रियाशील बनाउन मौद्रिक नीतिको भूमिका महत्वपूर्ण हुने गर्दछ ।
यद्यपि, मौद्रिक नीतिले मात्रै सबै कुरा सम्बोधन गर्दैन । मौद्रिक नीतिले बजारमा ब्याजदरलाई स्थिरता दिने र सँगसँगै लगानीका लागि वातावरण बनाइदिने हो । विभिन्न निकाय र नीतिहरुसँग तादम्यता मिलाएर काम गर्नुपर्ने हुन्छ । त्यसतर्फ मौद्रिक नीति केन्द्रित देखिन्छ ।बैंकदर र नीतिगतदर घटाइएको छ । निर्माण व्यवसायीलाई प्रवाह भएको कर्जाको साँवाब्याज तिर्ने अवधि २०८१ मंसिर मसान्तसम्म थप गर्ने, उनीहरुलाई चेक अनादर भएका आधारमा मात्र कालोसूचीमा समावेश नगर्नेलगायत विभिन्न सहुलियत दिइएको छ ।
संस्थागत सेयर धितो कर्जाको सीमा हटाइएको छ । गभर्नर अधिकारीकै भनाइमा समग्र मौद्रिक तथा वित्तीय क्षेत्र व्यवस्थापनका लागि राष्ट्र बैंकले सन्तुलित ढंगले सजगताका साथ लचिलो मौद्रिक नीति ल्याएको छ । अर्थतन्त्रलाई गतिशील बनाउन मौद्रिक नीति कति प्रभावकारी बन्ला भन्ने यसको कार्यान्वयन पक्षमा भर पर्ने छ ।
