अब सबै क्षेत्रलाई समेट्ने गरी वर्षको एकपटक भाषा परीक्षाका लागि आवेदन आह्वान गरिने छ । आवेदकले आफूले चाहेको क्षेत्र छनोट गरी फाराम भर्न र परीक्षा दिन सक्ने छन् ।
मैया कँडेल
निर्देशक, इपिएस कोरिया शाखा
काठमाडौं– आगामी वर्षदेखि इपिएस भाषा परीक्षा वर्षमा एकपटक मात्र सञ्चालन हुने भएको छ । एचआरडी कोरियाले रोजगार अनुमति प्रणाली (इपिएस) मार्फत लैजाने श्रमिकका लागि सबै क्षेत्रमा एकैपटक आवेदन आह्वान गर्ने तयारी गरेको हो ।
वैदेशिक रोजगार विभागअन्तर्गतको इपिएस कोरिया शाखाका अनुसार सन् २०२५ देखि कोरियाले लैजान चाहेको सबै क्षेत्रका श्रमिकलाई एकैपटक इपिएस परीक्षाका लागि आवेदन माग गर्ने तयारी भइरहेकोे जानकारी दिएको छ ।
कोरियाले हाल विभिन्न चार क्षेत्रमा काम गर्न नेपाली श्रमिक लैजान थालेको छ । यसअघि कृषि र उत्पादनमूलक क्षेत्रमा मात्रै श्रमिक लिने गरेको कोरियाले पछिल्लो समय सिप बिल्डिङ र सेवामूलक क्षेत्रमा पनि लैजान सुरु गरेको छ ।
यी क्षेत्रहरुमा फरक–फरक समयमा भाषा परीक्षाका लागि आवेदन लिँदा विभिन्न समस्या बेहोर्नुपर्ने र आवेदन दिने परीक्षार्थीको संख्या पनि उच्च हुने भएकाले उक्त समस्या नियन्त्रणका लागि सबै क्षेत्रमा लागू हुनेगरी एकैपटक आवेदन दिन सकिने व्यवस्था गर्न लागिएको इपिएस शाखाले जनाएको छ ।
शाखाकी निर्देशक मैया कँडेलले ठूलो संख्यामा कोरियन भाषा पढेर कोरिया जान तयार रहेकाहरूले सबै क्षेत्रमा आवेदन दिँदा परीक्षा सञ्चालनमा कठिनाइ हुनुका साथै श्रमिक छनोट तथा रोस्टरमा सूचीकृत गर्न ढिलाइ हुने भएकाले एकैपटक आवेदन आह्वान गर्ने तयारी भएको बताइन् ।
‘अब सबै क्षेत्रलाई समेट्ने गरी वर्षको एकपटक भाषा परीक्षाका लागि आवेदन आह्वान गरिने छ,’ उनले भनिन्, ‘आवेदकले आफूले चाहेको क्षेत्र छनोट गरी फाराम भर्न र परीक्षा दिन सक्ने छन् ।’
अनलाइनमार्फत आवेदन दिने व्यवस्था भएकाले एउटा क्षेत्र छनोट गरेका आवेदकले अर्को क्षेत्र छनोट गर्ने अवसर नपाउने र वर्षमा एकपटक मात्रै भाषा परीक्षा दिन सकिने निर्देशक कँडेलको भनाइ छ । उनका अनुसार कोरियालाई सबै क्षेत्रमा चाहिने आवश्यक जनशक्ति एकैचोटि माग गर्नेगरी कोटा निर्धारण गर्न आग्रह गरिएको छ । ‘यसो भएमा कृषि, उत्पादनमूलक, सिप बिल्डिङ तथा सेवामूलक क्षेत्र सबैका लागि एकैपटक आवेदन आह्वान गर्न सजिलो हुन्छ,’ उनले भनिन् ।
कोरियाले इपिएस प्रणालीमार्फत नेपाललगायत १६ वटा मुलुकबाट श्रमिक लैजाने गरेको छ । कोरियाले व्यवस्था गरेअनुसार एक वर्षमा एउटा क्षेत्रमा मात्र भाषा परीक्षाका लागि आवेदन दिन पाइन्छ । यद्यपि, सन् २०२३ मा कोरियाले उत्पादनमूलक क्षेत्रमा लैजान १५ हजार ४४८ नेपालीको कोटा निर्धारण गरी आवेदन माग गरेकोमा सोही वर्ष सिप बिल्डिङ क्षेत्रमा असफल भएकाहरूले पनि फाराम भर्ने अवसर पाएका थिए ।
सिप बिल्डिङमा असफल भएका र नयाँ गरी एक लाख ६३ हजार ६३५ जनाले उत्पादनमूलक क्षेत्रमा जान परीक्षाका लागि आवेदन दिएको शाखाले जनाएको छ । सिप बिल्डिङमा असफल भएकाहरुले पनि उत्पादनमूलक क्षेत्रका लागि फाराम भर्न पाउनुपर्ने मागसहित आन्दोलनमा उत्रँदा दुई जनाको ज्यानसमेत गएको थियो ।
कोरियाले रोजगारीको क्षेत्र बढाउँदै लैजाँदा नेपालबाट जाने श्रमिकको संख्या पनि उल्लेख्य बढ्दै गएको छ । साथै कोरियाले नेपाली श्रमिकहरुलाई प्रथमिकतामा राख्दै माग संख्या पनि बढाउँदै लगेको इपिएस शाखामा रहेको पछिल्ला केही वर्षको तथ्यांकले देखाएको छ । गत वर्ष झण्डै २० हजार नेपाली श्रमिक रोजगारीका लागि कोरिया पुगेको इपिएस शाखाले जनाएको छ ।
यद्यपि, कोरियाले माग गरेको संख्याको तुलनामा इपिएस परीक्षामा सहभागी हुन फाराम भर्नेहरुको संख्या अप्रत्यासित बढेका कारण वर्षभरि नै परीक्षा गर्नुपर्ने बाध्यता आइपरेको निर्देशक कँडेलले बताइन् ।यसलाई व्यवस्थित र पादर्शी बनाउन माग संख्याको तीन गुणामात्रै आवेदन दिन मिल्ने अनलाइन प्रणालीमा व्यवस्था गरिएको उनले जानकारी दिइन् ।
‘माग संख्याको तीन गुणा आवेदन पुगेपछि स्वतः आवेदन अस्वीकृत हुन्छ,’ निर्देशक कँडेलले भनिन् । श्रम, रोजगार तथा सामाजिक सुरक्षा मन्त्रालय, वैदेशिक रोजगार विभाग, विभागअन्तर्गतको इपिएस कोरिया शाखा र एचआरडी कोरियाबीच पटक–पटक भएको छलफलबाट उक्त निर्णय भएको उनले बताइन् ।
