काठमाडौं– पछिल्लो छ महिनामा वैदेशिक रोजगारीमा गएका ६८२ जना नेपाली श्रमिकले विदेशी भूमिमा ज्यान गुमाएका छन् । वैदेशिक रोजगार बोर्डको तथ्यांकअनुसार चालु आर्थिक वर्षको छ महिना १५ दिनमा श्रम स्वीकृति लिएर रोजगारीका लागि विभिन्न मुलुकमा पुगेका ६८२ जना नेपाली श्रमिकले ज्यान गुमाएका हुन् ।
यसरी ज्यान गुमाउनेमा ६६६ जना पुरुष र १६ जना महिला श्रमिक रहेका छन् । बोर्डको तथ्यांकअनुसार उक्त अवधिमा मासिक सरदर १०० जनाभन्दा बढी नेपालीले विदेशमा ज्यान गुमाएको देखिन्छ । सबैभन्दा बढी रोजगारीका क्रममा साउदी अरेबिया गएका नेपालीले ज्यान गुमाएका छन् । साउदीमा उक्त अवधिभित्र १७९ जना नेपालीको मृत्यु भएको तथ्यांक छ । त्यस्तै मलेसियामा १७६, कतारमा १२५, युएईमा ११०, कुवेतमा ३२, दक्षिण कोरियामा १५, बहराइनमा १४ र अन्य मुलुकमा ३१ जना नेपाली श्रमिकले ज्यान गुमाएको बोर्डको तथ्यांकले देखाएको छ ।
जिल्लागत रुपमा सबैभन्दा बढी सिराहाबाट रोजगारीका लागि विदेश गएका नेपालीहरुले ज्यान गुमाएका छन् । पछिल्लो छ महिनाको अवधिमा सिराहाका ३९ जनाको मृत्यु भएको छ । त्यस्तै झापा र महोत्तरीका ३४/३४ जना, मोरङका ३२, धनुषाका २७, रुपन्देहीका २६, दाङका २२, स्याङ्जाका १९, नवलपरासी पूर्वबाट १८, रोल्पाबाट १६, रौतहटबाट १५, बारा र सप्तरीबाट १४/१४ र बाँके, बागलुङ, मकवानपुरबाट १२/१२ जनाले ज्यान गुमाएका छन् ।
यसैगरी प्रादेशगत आधारमा चालु आवको छ महिना १५ दिनमा मधेस प्रदेशबाट १६४ जना, कोशी प्रदेशबाट १५६ जना, लुम्बिनी प्रदेशबाट १३५ जना, गण्डकी प्रदेशबाट १०० जना, बागमती प्रदेशबाट ८१ जना, कर्णाली प्रदेशबाट ३० जना र सुदूरपश्चिम प्रदेशबाट १६ जनाले वैदेशिक रोजगारीको शिलशिलामा ज्यान गुमाएको बोर्डले जनाएको छ । विदेश जाने नेपालीहरुको प्राकृतिक, आत्महत्या, सडक दुर्घटना, हृदयघात, कार्यस्थलमा हुने दुर्घटना, हत्या, गम्भीर प्रकृतिका रोगलगायतका कारणले मृत्यु हुने गरेको बोर्डले उल्लेख गरेको छ ।
सरकारले औपचारिक माध्यमबाट श्रम स्वीकृति लिएर विदेशमा पुगी ज्यान गुमाएका मृतक संख्याको अभिलेख राख्ने गरेको छ । यद्यपि अवैध तरिकाले विदेश गएका वा अन्य कारणले अवैध हुन पुगेका श्रमिकको मृत्यु भएमा कुनै अभिलेख राख्ने गरिँदैन । तसर्थ रोजगारीका लागि विदेश गएका कति श्रमिकको मृत्यु भयो भन्ने यकीन तथ्यांक पाउन मुस्किल छ ।
सरकारले श्रम स्वीकृति लिएर विदेश गएका श्रमिकको मृत्यु भएमा उनीहरुको परिवारलाई आर्थिक सहायता उपलब्ध गराउँदै आएको छ । जसअन्तर्गत बोर्डमार्फत मृतकका परिवारले सात लाख रुपैयाँ आर्थिक सहायता प्राप्त गर्ने छ । सरकारले २०६५ सालदेखि विदेशमा काम गर्ने क्रममा मृत्यु भएका श्रमिकका परिवार तथा अंगभंग भएका श्रमिकलाई आर्थिक सहायता उपलब्ध गराउन थालेको हो । विदेश जाने श्रमिकले कल्याणकारी कोषमा जम्मा गरेको रकमबाट नै सरकारले आर्थिक सहायता उपलब्ध गराउँदै आएको छ ।
