काठमाडौं– साउदी जाने नेपाली श्रमिकहरूका लागि बायोमेट्रिक अनिवार्य गरेपछि वैदेशिक रोजगार व्यवसायीहरु आन्दोलित भएका छन् । नेपालस्थित साउदी अरेबियाको राजदूतावासले सोमबार (जनवरी १) बाट बायोमेट्रिक अनिवार्य गरेको विरोधमा व्यवसायी आन्दोलित भएका हुन् ।
यसअघि फेमिली (पारिवारिक) भिसा र भिजिट (भ्रमण)भिसामा मात्रै बायोमेट्रिक लागू गर्दै आएको दूतावासले नेपाल सरकार र सम्बन्धित सरोकारवालाहरुसँग छलफल नै नगरी श्रमिकका लागि एकपक्षीय रुपमा बायोमेट्रिक अनिवार्य गरेकोले आन्दोलनमा उत्रन बाध्य भएको व्यवसायीले बताएका छन् ।
उक्त कार्यको विरोध गर्दै नेपाल वैदेशिक रोजगार व्यवसायी संघको अगुवाइमा व्यवसायीहरुले सोमबार थापाथलीस्थित साउदी दूतावासको सेवाप्रदायक संस्था भिएसएफ सेन्टरको कार्यालयमा घेराउ तथा प्रदर्शन गरे । उनीहरुले दूतावासलाई दबाब दिन भन्दै भिसाका लागि श्रमिकको पासपोर्ट पेस गर्न गएका म्यानपावर व्यवसायीलाईसमेत रोक लगाउँदै फिर्ता पठाए । उता दूतावासले महŒवपूर्ण सूचना भन्दै जनवरी १ देखि बायोमेट्रिक अनिवार्य गरिएको म्यानपावर व्यवसायीहरुलाई जानकारी दिएको छ । भिएसएफले बायोमेट्रिकविना भिसाका लागि कुनै पनि कामदारको पासपोर्ट नलिने प्रस्ट पारेको छ ।
साउदी दूतावासले म्यानपावर व्यवसायीहरुलाई बायोमेट्रिक अनिवार्य गरिएको सूचना जारी गरे पनि श्रम, रोजगार तथा सामाजिक सुरक्षा मन्त्रालय र परराष्ट्र मन्त्रालयलाई कुनै जानकारी दिएको छैन । यसमा श्रम मन्त्रालयले गम्भीर ध्यानाकर्षण भएको भन्दै परामर्श र छलफल नगरी कार्यान्वयनमा नजान परराष्ट्रमार्फत नेपालस्थित साउदी दूतावासलाई पत्राचार गरिसकेको जनाएको छ ।
व्यवसायी र श्रमिकको हितविरुद्ध हुने गतिविधि र भविष्यमा हुने सिण्डिकेट रोक्न पनि हाम्रो आन्दोलन र खबरदारी निरन्तर रहन्छ ।
राजेन्द्र भण्डारी
अध्यक्ष, नेपाल वैदेशिक रोजगार व्यवसायी संघ
यद्यपि, दूतावासले बायोमेट्रिकको व्यवस्था नहटाएसम्म आन्दोलन जारी रहने संघका अध्यक्ष राजेन्द्र भण्डारीले बताए । ‘आन्दोलन गर्नै पर्ने अवस्था आयो,’ उनले भने, ‘व्यवसायी र श्रमिकको हितविरुद्ध हुने गतिविधि र भविष्यमा हुने सिण्डिकेट रोक्न पनि हाम्रो आन्दोलन र खबरदारी निरन्तर रहन्छ ।’ भिसाका लागि भिएसएफ पुगेका व्यवसायीहरुलाई पनि बायोमेट्रिकको निर्णयबाट दूतावास पछि नहटेसम्म पासपोर्ट पेस नगर्न आग्रह गर्दै फिर्ता पठाइएको उनले जानकारी दिए ।यसअघि पनि दूतावासको कन्सुलेट अफिसले विभिन्न बहानामा व्यवसायीलाई दुःख दिने, सीमित कम्पनीलाई मात्रै आइडी कार्ड प्रदान गर्ने, बेलाबेलामा आइडी कार्ड बन्द गरिदिने र समिति संख्यामा मात्रै भिसा पेस गर्न दिने जस्ता कार्य गर्दै आएको भण्डारीले बताएका छन् ।
दूतावासले श्रमिकहरुलाई अनावश्यक रुपमा आार्थिक भार पर्ने गरी पैसा उठाउने उद्देश्यले प्रेरित भई बायोमेट्रिक लागू गरेको भण्डारीको भनाइ छ । बायोमेट्रिकका लागि दूतावासले ७३० रुपैयाँ शुल्क तोकेको छ । दूतावासले उक्त कार्यका लागि नेपाल सरकारसँग कुनै समन्वय र सहमतिसमेत नलिएको उनले बताए । यस विषयमा साउदी दूतावासले भने कुनै प्रतिक्रिया जनाएको छैन ।
