काठमाडौं– इजरायलले दीर्घकालीन स्याहार केन्द्रका लागि सहायक कामदार (केयर गिभर)को अभाव हुन नदिन थप आप्रवासी कामदार भित्र्याउने तयारी थालेको छ । इजरायलले केयर गिभरका लागि कामदार भित्र्याउने तयारी थालेपछि त्यहाँस्थित नेपाली राजदूतावासले नेपाली कामदारलाई प्राथमिकतामा राख्नुपर्ने भन्दै आवश्यक छलफल तथा परामर्श अघि बढाउने भएको छ ।
इजरायलले यसअघि गएका नेपाली कामदारहरुले विश्वास जितेको भन्दै नेपालबाट थप कामदार लैजाने संकेत देखाएको दूतावासले जनाएको छ । नेपालबाट थप एक हजार ५०० भन्दा बढी केयर गिभर लैजाने अनौपचारिक जानकारी पाएपछि दूतावासले आवश्यक तयारी गरिरहेको बताइएको छ ।
दूतावासका प्रथम सचिव अर्जुन घिमिरेले यही असोज ९ गते (मंगलबार) इजरायलमा सहायक कामदार भित्र्याउने सम्बन्धमा नेपाललाई दिने सक्ने निश्चित कोटामा छलफल हुने बताए । दीर्घकालीन स्याहार केन्द्रमा विदेशी कामदार अभाव देखिएपछि उक्त क्षेत्रमा नेपालीहरुलाई अवसर दिने सम्बन्धमा इजरायली पक्ष सकारात्मक देखिएको उनले जानकारी दिए । हाल इजरायलमा जिटुजी सम्झौतामार्फत गएर काम गर्ने नेपालीको संख्या एक हजार १०० भन्दा बढी रहेका छन् ।
त्यस्तै गत हप्ता गैरआवासीय नेपाली संघ इजरायलले आयोजना गरेको अन्तरक्रिया कार्यक्रममा पनि राजदूत कान्ता रिजालले एक हजारभन्दा बढी नेपाली केयर गिभरलाई रोजगारीको अवसर दिने सम्बन्धमा इजरायली पक्षसँग छलफल भइरहेको बताएकी थिइन् ।
यसअघि थप ५०० नेपाली सहायक कामदार लैजान सकिने बताउँदै आए पनि निरन्तरको प्रयासबाट इजरायल माग संख्या थप्न सकारात्मक भएको बताइएको छ । इजरायली पक्षबाट निश्चित कोटा तोकेर नयाँ कामदार भर्नाका लागि छिट्टै सम्झौता गर्ने आवश्वासन दिएपछि दूतावासले यसको तयारी गरिरहेको जनाएको छ ।
यस्तै नयाँ कामदार भर्नाका सम्बन्धमा मात्र नभई जिटुजी प्रक्रियामार्फत इजरायलमा काम गरिरहेका नेपालीहरूले झेलिरहेको भिसा नवीकरणलगायतका समस्या समाधानका लागि पनि दूतावासले पहल गरिरहेको उल्लेख गरेको छ । जसमा ३०० भन्दा बढी कामदारको भिसा नवीकरणमा ढिलाइ भइरहेको बताइएको छ ।
इजरायलले थप नेपालीलाई रोजगारीको अवसर दिने प्रतिबद्धता जनाए आवश्यक तयारी गर्ने वैदेशिक रोजगार विभाग इजरायल शाखाले जनाएको छ । यसअघि एक कार्यक्रममा इजरायलमा नेपालीहरुले केयर गिभरको रुपमा राम्रो पारिरहेको भन्दै नेपालका लागि इजरायली राजदूत हनान गोडेरले वार्षिकरूपमा नेपाली कामदारको माग संख्या वृद्धि गर्दै लैजाने आफ्नो सरकारको नीति रहेको बताएका थिए । उनले अहिले पनि भिसा जारी हुन ढिलाइ भएका कामदारहरुलाई क्रमैसँग भिसा दिँदै रोजगारीका लागि अवसर दिइरहेको बताए ।
आकर्षक गन्तव्य मानिएको इजरायल जाने नेपाली कामदारले मासिक एक हजार ६०० डलर अर्थात् हालको विनिमयअनुसार दुई लाख १० हजार रुपैयाँभन्दा बढी पारिश्रमिक पाउने गर्छन् । रोजगारीका लागि इजरायल जाने कामदारको करार सम्झौता एक वर्षको हुने भए पनि पाँच वर्षसम्म भिसा नवीकरण हुने व्यवस्था छ । इजरायलले पछिल्लो समय केयर गिभरबाहेक कृषि तथा निर्माण क्षेत्रमा पनि नेपाली कामदार लैजाने सकिने बताउँदै आएको छ ।
