२० भदौका दिन भृकुटीमण्डपमा नेपाली कांग्रेसका सहमहामन्त्री महेन्द्र यादवमाथि खुकुरी प्रहार भयो । रिपोर्टर्स क्लबको कार्यक्रममा सहभागी भएर निस्किँदै गर्दा उनीमाथि खुकुरी प्रहार भएको थियो । खुकुरी प्रहारबाट घाइते नेता यादव उपचाररत छन् । उक्त घटनाले राजधानीको सुरक्षा व्यवस्था चुनौतीपूर्ण रहेको भन्दै प्रश्न उब्जाएको थियो । तर उक्त घटना सेलाउन नपाउँदै फेरि अर्को पाशविक घटनाले उक्त प्रश्नमाथि थप पुस्ट्याइँ गरेको छ ।
नेता यादवमाथि आक्रमण भएको १० दिनपछि शनिबार राजधानीको तीनकुनेस्थित गैह्रीगाउँमा चारजनाको सामूहिक हत्या भएको छ । यसले मुलुकको संघीय राजधानी काठमाडौंको शान्ति सुरक्षाको स्थिति नाजुक रहेको छर्लंग पारेको छ । एकै परिवारका तीनसहित चार जनाको हत्या हुँदा करिब ५०० मिटर दूरीमा रहेको बानेश्वर प्रहरी वृत्तमा रहेका प्रहरीले थाहा पाएनन् । करिब त्यति नै दूरीमा कोटेश्वर प्रहरी प्रभाग छ । यहाँ रहेका प्रहरीे पनि नजिकै गम्भीर प्रकृतिको आपराधिक घटना घटिरहँदा बेखबर रहे ।
घटनामा ७६ वर्षीया शुभद्रा भुजेल, छोरा अन्दाजी ५५ वर्षीय कुमार भुजेल, बुहारी ५२ वर्षीया अम्बिका भुजेल र १९ वर्षीय नवीन राईले ज्यान गुमाए । भुजेल परिवार दोलखाको हो । नवीन भने मोरङको बेलबारीको रहेको खुलेको छ । उनीहरूको हत्या गैह्रीगाउँको दिव्य सःमिल काष्ठ उद्योग परिसरको एक तले जस्तापाताले छाएको टहरामा भएको हो । घटना मध्यरातमा भएको देखिन्छ ।
उपत्यकामा प्रहरीको रात्रिकालीन गस्ती दिनहुँ हुन्छ । काठमाडौं उपत्यका प्रहरी कार्यालय रानीपोखरीका प्रवक्ता प्रहरी वरिष्ठ उपरीक्षक (एसएसपी) दिनेशराज मैनालीका अनुसार शनिबार पनि रात्रिकालीन गस्तीमा प्रहरी परिचालित थिए । रातिको समयमा आपराधिक गतिविधि हुनसक्ने भएकोले त्यसलाई नियन्त्रण गर्न गस्ती गरिन्छ । तर, गैह्रीगाउँ हत्याकाण्डले त्यस्तो गस्तीको प्रभावकारितामाथि नै प्रश्न उठाएको छ ।
जनतालाई सुरक्षाको प्रत्याभूति दिलाउनु सरकारको दायित्व हो । संविधानले नै नागरिकको बाँच्न पाउने अधिकार सुनिश्चित गरेको छ । तर, सरकारका सुरक्षा निकाय जनताको जीवनरक्षा गर्ने जिम्मेवारीबाट चुकेको यी घटनाले प्रस्ट पार्दछ । राजधानीमै भइरहेका यस्ता घटनाले जनतामा त्रास उत्पन्न गराएको छ । यस्ता कार्य के कारण भइरहेका छन् भन्नेबारे यथार्थ छानबिन गर्न आवश्यक छ । घटनामा संलग्नहरुको पहिचान गरी तत्काल कारबाहीको दायरामा ल्याउनुपर्छ ।
जनतालाई सुरक्षाको अनुभूति दिलाउन सरकार र सुरक्षा निकायले कुनै कसर बाँकी राख्नुहुन्न । यस्ता घटना दोहोरिन नदिन सुरक्षा निकायले सतर्कताका साथ आफ्ना जनशक्ति परिचालन गर्नुपर्छ । शान्ति सुरक्षाको ग्यारेण्टी गर्ने जिम्मेवारी पाएको गृह मन्त्रालय र मातहतका निकायहरु यसमा गम्भीर भएर लाग्नुपर्छ । फेरि यस्ता हिंसात्मक घटना नदोहोरियोस् ।
