काठमाडौं– सरकारले श्रम स्वीकृतिलगायतका सेवाहरु विकेन्द्रीकरण गरी प्रदेशस्तरबाटै दिन थालेपछि वैदेशिक रोजगारीमा जाने युवाहरु लाभान्वित भएका छन् । श्रम, रोजगार तथा सामाजिक सुरक्षा मन्त्रालयले काठमाडौंमा मात्रै केन्द्रीकृत भएको वैदेशिक रोजगारसम्बन्धी सेवाहरुलाई विकेन्द्रित गर्दै गत वर्षदेखि प्रदेशबाटै सेवा प्रवाह गर्न थालेपछि त्यसको सकारात्मक प्रभाव देखिएको हो ।
श्रम तथा व्यवसायजन्य सुरक्षा विभागका अनुसार श्रम स्वीकृतिको काम प्रदेशका श्रम कार्यालयबाट गत आर्थिक वर्षमा ७५ हजार ११८ जना श्रमिकले सेवा लिएका छन् । सेवाग्राहीले श्रम कार्यालयबाट पुनः तथा व्यक्तिगत श्रम स्वीकृतिमात्रै लिएको विभागले जनाएको छ । जसमा पुनः श्रम स्वीकृति लिनेको संख्या ६९ हजार ५९५ र व्यक्तिगत श्रम स्वीकृतिको संख्या पाँच हजार ५२३ रहेको उल्लेख गरिएको छ । सरकारले २०७५ सालदेखि पुनः श्रम स्वीकृतिसम्बन्धी सेवा प्रदेशमा रहेका श्रम तथा रोजगार कार्यालयमार्फत प्रदान गर्दै आए पनि प्राविधिक र जनशक्तिको अभावमा अड्किएको थियो । तर गत वर्षदेखि पुनः श्रम स्वीकृतिसहित नयाँ तथा व्यक्तिगत श्रम स्वीकृति दिने निर्णय गरेसँगै सेवाग्राहीले प्रदेश कार्यालबाटै सेवा लिन थालेका छन् ।
विभागका प्राविधिक निर्देशक एवं प्रवक्ता इ. मणिनाथ गोपले वैदेशिक रोजगार विभागबाट हुँदै आएको श्रम स्वीकृतिसम्बन्धी सेवाहरु प्रदेशमा रहेका श्रम विभागअन्तर्गतका कार्यालयबाट प्रवाह हुँदा सेवाग्राही लाभान्वित भएको बताए ।
‘आफ्नो पायक पर्ने श्रम कार्यालयबाट श्रम स्वीकृतिलगायतका सेवा पाउने भएपछि विदेश जानेहरुलाई काठमाडौं धाउनुपर्ने झण्झट हटेको छ,’ उनले भने, ‘यसले श्रमिकको अतिरिक्त पैसा, समय खर्च हुनबाट जोगाएको छ ।’ श्रमसम्बन्धी सबै गतिविधि सञ्चालनमा ल्याइए पनि दुई वर्षयता विभाग मातहतका श्रम कार्यालयको जनशक्ति प्रयोग गरेर श्रम स्वीकृतिको काम हुँदै आएको छ । हाल सबै श्रम तथा रोजगार कार्यालयबाट अनलाइनमार्फत नै संस्थागत, व्यक्तिगत र पुनः श्रम स्वीकृति सेवा प्रवाह हुनेगरी पूर्वाधार तयार भएको प्रवक्ता गोपले जानकारी दिए ।
हाल वैदेशिक रोजगार कार्यालय ताहाचल काठमाडौंबाहेक प्रदेशिकरुपमा विराटनगर, जनकपुर, पोखरा, बुटवल, सुर्खेत र धनगढीमा रहेका श्रम तथा रोजगार कार्यालयबाट अनलाइनमार्फत श्रम स्वीकृतिसम्बन्धी सम्पूर्ण सेवा विस्तार गरिएको छ । यसअघि उल्लिखित कार्यालयबाट पुनः श्रम स्वीकृतिको काममात्र हुने गरेको थियो ।
सरकारले श्रम स्वीकृतिको कार्यलाई प्रदेशमा विकेन्द्रीकरण गरेपछि वैदेशिक रोजगारीमा जाने युवाहरु मात्र नभई म्यानपावर कम्पनी, अभिमुखीकरण तालिमप्रदायक संस्थासमेत लाभन्वित भएका छन् । जसका कारण नयाँ श्रम स्वीकृतिका लागि मागपत्र, सम्झौतापत्र लगायतका कागजात प्रमाणीकरणका लागि काठमाडौं धाउनुपर्ने बाध्यता हटेको छ ।
अहिले वैदेशिक रोजगार विभागको अनुमति प्राप्त म्यानपावर कम्पनी काठमाडौंमा मात्रै ८६८ वटा सञ्चालनमा रहेका छन् । यस्तै, काठमाडौंबाहिर विभिन्न म्यानपावरका ५१ वटा शाखा कार्यालय छन् । प्रदेशस्थित श्रम तथा रोजगार कार्यालयबाट वैदेशिक रोजगारसम्बन्धी सम्पूर्ण सेवा प्रवाह हुन थालेपछि काठमाडौंमा रहेको वैदेशिक रोजगार कार्यालयमा सेवाग्राहीको चाप घट्दै गएको बताइएको छ ।
