काठमाडौं- सञ्चारकर्मी भक्त स्याङतानको पहिलो कृति ‘डम्फुको आत्मालाप’ सार्वजनिक भएको छ। शुक्रबार बत्तीसपुतलीस्थित शिल्पी थियटरमा आयोजित समारोहमा प्राध्यापक अरुण गुप्तो, उपप्राध्यापक एवं निबन्धकार कुमारी लामा, नेपाल टेलिभिजनका महाप्रबन्धक फूलमान बल, लेखक स्याङतानलगायतले संयुक्तरुपमा पुस्तक सार्वजनिक गरेका हुन्।
कार्यक्रममा पुस्तकमाथि टिप्पणी राख्दै प्राध्यापक गुप्तोले तामाङ समुदायको विविध पक्षलाई बुझ्ने अवसर पुस्तकमा पाइने बताए। उनले तामाङ सभ्यतालाई लेखकले विम्व र चित्रलिपिमा बुझिनेगरी प्रस्तुत गरिएको बताउँदै प्रशंसा गरे।
निबन्धकार लामाले तामाङ जातिको पहिचान र वास्तविक चित्र पुस्तकमा पाइने बताइन्। यस पुस्तकमार्फत तामाङ समुदायको इतिहासलाई दस्तावेजीकरण तथा पहिचानको सवाललाई उजागर गर्न लेखक सफल भएको उनले बताइन्।
नेपाल टेलिभिजनका महाप्रबन्धक बलले राज्यबाटै दबाइएको तामाङ जातिको इतिहासदेखि वर्तमान अवस्थालाई समेटेर लेखकले पुस्तक प्रकाशनमा ल्याएको भन्दै प्रशंसा गरे। ‘विगतदेखि नै राजनीतिक तथा विभिन्न क्षेत्रमा तामाङहरु कुन बाटोमा अगाडि जाने भन्ने अलमलमा रहेको अवस्था थियो, यो पुस्तकले स्पष्ट मार्ग पहिचान गरिदिएको छ,’ उनले भने, ‘राज्यको दमनमा परेका तामाङ समुदायले आजसम्म पनि आफ्नो पहिचानका लागि संघर्ष गरिरहेको वास्तविकता पुस्तकमा उजागर गरिएको छ।'
तामाङ समुदायको विषयमा केन्द्रित रहेर लेखिएको उक्त पुस्तक सांग्रिला बुक्सले प्रकाशन गरेको हो। पुस्तकमा लुङ्दर, छ्योर्तेन, न्होरला, छेदिङमो, जलजला, म्लाङगैको आपा, पेम्बाको कथा, दलुचा, डम्फुको आत्मालाप, याम्बुमा लाक्पाको संघर्ष, बुट्टे गलबन्दी शीर्षकका ११ कथा समेटिएका छन्।
लामो समयदेखि पत्रकारितामा क्रियाशील लेखक स्याङतान हाल काभ्रेस्थित रेडियो नमोबुद्धका अध्यक्ष छन्।
-1752335779.jpg)
