सूर्य कर्पोरेसनले फिर्ता ग¥यो पीडितलाई १५ लाख
काठमाडौं– वैदेशिक रोजगार विभागले अनधिकृतरुपमा वैदेशिक रोजगारसम्बन्धी गतिविधि सञ्चालन गर्ने एजुकेसन कन्सल्टेन्सी सूर्य कर्पोरेसन प्रालिबाट पीडितहरुलाई १५ लाख रुपैयाँ फिर्ता गराएको छ । विभिन्न व्यक्तिलाई वैदेशिक रोजगारीका लागि जापान पठाइदिने भन्दै उक्त कन्सल्टेन्सीले विगत तीन वर्षदेखि पासपोर्ट र पैसा लिएको उजुरीका आधारमा विभागले छापा मारी पीडितहरुलाई रकम फिर्ता गराउन सफल भएको हो ।
पीडितहरुले विगत तीन वर्ष अगाडिदेखी रकम र पासपोर्ट बुझिलिई हालसम्म नपठाएकोले रकम र पासपोर्ट फिर्ता दिलाई कन्सल्टेन्सीमाथि कानुनी कारबाही हुनुपर्ने भन्दै उजुरी परेको विभागले जनाएको छ । सोही उजुरीको आधारमा विभागले कन्सल्टेन्सीमा मंसिर २३ गते छापा मारी ८३ वटा पासपोर्ट र वैदेशिक रोजगारीसँग सम्बन्धित कागजातसमेत बरामद गरेको थियो । सोही दिन उक्त कन्सल्टेन्सीका छ जना कर्मचारीलाई नियन्त्रणमा लिइएको थियो ।
महŒवपूर्ण कागजात, कर्मचारी र पासपोर्टसमेत नियन्त्रणमा लिएपछि सम्पर्कमा आएका कन्सल्टेन्सीका सञ्चालकले पीडितहरुलाई रकम फिर्ता गराएको विभागका निर्देशक तथा सूचना अधिकारी कृष्णप्रसाद भुसालले बताए । विभागबाट वैदेशिक रोजागारका लागि इजाजतपत्र नलिएको कन्सल्टेन्सीले किन र कुन प्रयोजनका लागि पासपोर्ट र रकम संकलन गरेको हो, त्यस सम्बन्धमा आवश्यक अनुसन्धान भइरहेको भुसालले जानकारी दिए । उजुरी दिएका पीडितहरुलाई रकम फिर्ता गराइए पनि अनधिकृतरुपमा संकलन गरिएका पासपोर्ट भने फिर्ता नभएको विभागले जनाएको छ ।
कन्सल्टेन्सीका सञ्चालक दाजुभाइ वासुदेव लामिछाने र शम्भु लामिछानेले विभिन्न कार्यक्रम र अवार्डका नाममा विदेश लैजाने गरेको बुझिएको छ । लामिछाने दाजुभाइले भिजिट, ट्रेनिङ, वर्किङलगायत भिसा मिलाइदिने भन्दै विभिन्न व्यक्तिहरुबाट पासपोर्टसहित १० लाख रुपैयाँभन्दा बढी रकम लिने गरेको उनीहरुसँग निकट रहेका एक व्यवसायीले बताए । कन्सल्टेन्सीले यही डिसेम्बर १३ देखि २१ सम्म अस्ट्रेलियामा साकुरा नाइट कार्यक्रम गर्ने तयारी गरेको थियो ।
यसरी वैदेशिक रोजगारीका नाममा ठगी गर्ने कन्सल्टेन्सीविरूद्ध वैदेशिक रोजगार ऐन, २०६४ को दफा १० र ४३ अनुसार कारबाही प्रक्रिया अगाडि बढाउन जनाउँदै अधिकतम पाँच लाख रूपैयाँ जरिवाना र सात वर्ष जेल सजाय हुनसक्ने विभागले उल्लेख गरेको छ । विभागले पछिल्लो समय केही एजुकेसन कन्सल्टेन्सी, ट्राभल एजेन्सी र बिचौलियाहरुले मोटो रकम लिएर बेरोजगार युवाहरुलाई आकर्षक आम्दानीको प्रलोभन देखाई वैदेशिक रोजगारीमा पठाउने भन्दै ठगी गर्ने गरेका उजुरीहरु पर्ने गरेको जनाएको छ । यद्यपि, विभागले सोमबार एक सूचना जारी गर्दै वैदेशिक रोजगारसम्बन्धी इजाजतपत्र प्राप्त नगरेका त्यस्ता संस्थाहरुसँग कुनै पनि प्रलोभनमा नफस्न र आर्थिक क्रियाकलापमा संलग्न नहुन सर्वसाधारणलाई आग्रह गरेको छ ।
-1745656903.jpeg)