काठमाडौं– वैदेशिक रोजगारीका लागि साउदी अरेबिया पुगेर कठिनाइ झेलिरहेका थप ५४ जना नेपालीले बहिर्गमन (एक्जिट) भिसा पाएका छन् । साउदीको अध्यागमन कार्यालयले जारी गरेको नयाँ नियमअनुसार हुरुब लागेका (कम्पनी छोडेर भागेका) ५४ जना नेपालीले उक्त भिसा पाएका हुन् ।
साउदी सरकारले लागू गरेको नियमअनुसार एक्जिट भिसा प्राप्त गरेका व्यक्तिहरुले बढीमा एक हप्ताभित्र साउदी छोडिसक्नुपर्ने रियादस्थित नेपाली दूतावासले जनाएको छ । २७ नोभेम्बरदेखि डिसेम्बर १ सम्मको अवधिमा जम्मा ५४ जनाको एक्जिट भिसा प्राप्त भएको दूतावासले उल्लेख गरेको छ ।
हुरुब लागेका नेपालीहरुलाई एक साताभित्र साउदी छोड्न जानकारी दिँदै समयमै एक्जिट भिसाको म्याद हेर्न पनि दूतावासले अनुरोध गरेको छ । एक हप्ता अगाडि नै एक्जिट भिसा आएको उल्लेख गर्दै दूतावासले आफ्नो मोबाइलमा सन्देश प्राप्त नभए दूतावास आएर एक्जिट भिसाको कागज लैजान सकिने जनाएको छ । आफूले एक्जिट भिसा पाए÷नपाएको हेर्नका लागि दूतावासको आधिकारीक फेसबुक पेज वा वेवसाइटमा हेर्न सकिने बताइएको छ । एक्जिट भिसा प्रोसेसिङ निःशुल्क हुने दूतावासले उल्लेख गरेको छ । तर, एक्जिट भिसा आइसकेपछि नेपाल फर्किने हवाई टिकट व्यक्ति स्वयंले व्यवस्था गर्नुपर्ने उल्लेख गरिएको छ ।
इकामा (बस्ने अनुमति)को म्याद सकिएको तीन महिनाभन्दा बढी भैसकेका वा साउदी आएको तीन महिनाभन्दा बढी समयसम्म पनि इकामा प्राप्त नगरेका वा हुरूब लागेका व्यक्तिको मात्र एक्जिट भिसाको प्रक्रिया दूतावासले अगाडि बढाइदिने जानकारी दिइएको छ । त्यसैगरी, कुनै कसूर वा जरिवाना छ भने त्यसको छिनोफानो नभएसम्म एक्जिट भिसा नलाग्ने र भिसा दिने सम्पूर्ण अधिकार साउदीको अध्यागमन कार्यालयसँग मात्रै हुने दूतावासले प्रस्ट पारेको छ । यसअघि पाँच महिनाको अवधिमा पटक–पटक गरी झण्डै एक हजार २०० नेपालीले एक्जिट भिसा पाइसकेको दूतावासको तथ्यांकले देखाएको छ ।
प्रकाशित मिति: बिहीबार, मंसिर २२, २०७९ ११:१८
-1745656903.jpeg)