काठमाडौं– साउथवेस्टन साहित्य समाज, बसुन्धरा काठमाडौँले पिपल चौतारी गजल साँझ–०७८ आयोजना गरेको छ । साउथवेस्टन कलेज परिसरसँगै रहेको पिपलको चौतारीमा आयोजित गजल गायन र वाचनमा करिब सय जनाको उपस्थिति थियो । कार्यक्रममा २६ जना गजलकारले गजल वाचन गरेका थिए ।
गजल अरबी साहित्यमा सिर्जना भई उर्दू, फारसी, हिन्दीहुँदै नेपाली साहित्यमा प्रवेश गरेको कविता उपविधाअन्तर्गत पर्छ । नेपाली गजल भन्ने बित्तिकै गजलकार मोतीराम भट्ट र उनको मोतीमण्डलीलाई स्मरण धेरैले गर्छन । माया र प्रेम भाव व्यक्त हुने, श्रृंङ्गारिता प्रधान, लयबद्ध, अनुप्रासयुक्त, गायन र वाचन दुवै गर्न सकिने पद्यमय रचना गजल हो । काफिया, रदिफ, सेर, मिसरा, मतला, मकता, तखल्लुस यसका प्राविधिक पक्ष हुन् । गजल निकै पुरानो, लोकप्रिय र चर्चित रहेको छ । साउथवेस्टन साहित्य समाजद्वारा आयोजित पिपल चौतारी गजल साँझका वक्ताले पनि यिनै विचार व्यक्त गरेका थिए ।
साउथवेस्टन कलेजका क्याम्पस प्रमुख डा. राजेन्द्र केसीले शुभकामना मन्तव्य राख्दै साउथवेस्टन कलेज परिसरमा रहेको करिब डेढ सय वर्ष पुरानो पिपलको चौतारीमा साँझको समयमा चकटीमा बसेर माया प्रेम, अर्थ, राजनीति, व्यवस्थापन जस्ता विषय समेटिएका हार्दिकता, कोमलता र सुन्दरताका भावमय गजल वाचन गर्दा डेढ सय वर्ष पुरानो मोतीराम भट्ट र उनको भजन मण्डलीको सम्झना आएको बताए ।
कार्यक्रममा सिद्धिनारायण आचार्य, सन्तोष अमागाई, वसन्त वली वसन्ती, नारायण काँइलो, अल्पज्ञानी, शशी शर्मा मजगैया, उदास कार्की, एचके लामिछाने, राजेन्द्र घिमिरे सागर, रेणुका भण्डारी, मुकुन्दराज कँडेल, विप्लव निसानी, दुर्गाकिरण तिवारी, डा। प्रदीप मैनाली, विदुर अधिकारी देवदूत, प्रमोद थापा, देवेन्द्र अर्याल आँसु, धुव्रप्रसाद तिमल्सिना, बलराम दाहाल, भैरवी भूगोल, त्रिभुवनचन्द्र वाग्ले, शुसान्त न्यौपाने, रवि प्रञ्जल, ललितजङ रावल र रामबहादुर पहारीले गजल गायन तथा वाचन गरेका थिए ।
