'पैतालामा हिउँ,आँखामा हिमाल' नियात्रा कृतिकाे चर्चा

साहित्य

Home
साहित्य
'पैतालामा हिउँ,आँखामा हिमाल' नियात्रा कृतिकाे चर्चा

'पैतालामा हिउँ,आँखामा हिमाल' नियात्रा कृतिकाे चर्चा

Niyatra

काठमाडाै - अन्तर्राष्ट्रिय महिला दिवसको अवसर पारेर राजेन्द्रमान डङ्गोलकाे नियात्रा कृति 'पैतालामा हिउँ,आँखामा हिमाल'को परिचर्चा कार्यक्रम भएकाे छ । अन्तर्राष्ट्रिय महिला दिवसको अवसरमा राजधानीको सोह्रखुट्टेकाे होटल हिमालयन स्वीटमा राजेन्द्रमान डङ्गोलकाे नियात्रा कृति 'पैतालामा हिउँ,आँखामा हिमाल'को परिचर्चा कार्यक्रम सम्पन्न भएकाे हाे । उक्त कृतिको चिरफार गर्दै प्रगतिवादी साहित्यकार तथा राजनीतिकर्मी केशव पुडासैनी 'बिमल'ले कलात्मक रुपमा कृति उत्कृष्ट भएको जिकिर गरेका छन् । कुण्ठा र स्वैर कल्पनाले नियात्रालाई वास्तविक अर्थमा नियात्रा नबनाउने दाबी गर्दै उद्वेलन भन्दा समाधान जरुरी भएको अभिमत व्यक्त गरेका छन् । कृतिले समसामयिक समाजको अनुहार देखाउँदै परिवर्तनको सार्थकता प्रस्ट्याउनुपर्ने उनले अर्थ्याएका छन् ।त्यसरी नै अर्का प्रगतिशील साहित्यकार तथा समालोचक तेजविलाश अधिकारीले यात्रा सोद्देश्य हुने र नियात्रा लेखनले स्थान विशेषको संस्कृति र अर्थतन्त्र उत्थानमा भूमिका खेल्नुपर्ने अभिमत जाहेर गरेका छन् । कृति वाङ्मय र पर्यापर्यटनको दिग्दर्शन भएको उनको भनाइ थियो। निबन्धकार एवं चर्चित समालोचक कुमारी लामाले कृतिकार डङ्गोलमा प्रश्न गर्ने सामर्थ्य भएको जिकिर गरिन्। प्रश्न नै प्रतिरोध हुने र क्रान्तिको कलिलो बीज हुने पनि दाबी गरिन् । कृतिमा प्रयुक्त केही शब्दप्रति खरो विमति राख्दै कृतिकारलाई आगामी दिनमा सच्याउन आग्रह गरेकी छन् । वरिष्ठ नियात्राकार दामोदर पुडासैनी 'किशोर'ले समालोचकले पथप्रदर्शन गर्न त सक्ला किन्तु के, कति र कसरी लेख्ने भन्ने निर्णय लेखकको हुने दाबी गरे। यात्रा लेख्नु भनेको जीवन लेख्नु हो भन्ने अभिमत राख्दै साहित्यकारले डोर्याउने डोरेटो अग्रगमन हुने र हुनुपर्नेमा उनको जोड थियो । भाववाद र भौतिकवादमध्ये भौतिकवाद रोज्नु राम्रो हुने उनको राय थियो । त्यसरी नै अखिल नेपाल लेखक सङ्घका अध्यक्ष, सह-प्राध्यापक तथा बहुआयामिक प्रगतिशील साहित्यकार डा.धनप्रसाद सुवेदीले अधिकांश नियात्रा भ्रमण प्रतिवेदनभन्दा माथि उठ्न नसकेको यथार्थता औँल्याउँदै यो कृति त्यसभन्दा माथि उठेको जिकिर गरे । साहित्य जीवन्त हुने विचार व्यक्त गर्दै कृतिले सूचना प्रदायन मात्र नगरी प्रशोधन र व्यवस्थापनसमेत गरेको उनले बताए। प्रासङ्गिक कतिपय कुरालाई संश्लेषण गरी प्रस्तुत गर्दा कृति अझ खँदिलो हुने उनको राय थियो । कृतिकार राजेन्द्रमान डङ्गोलले रचना-गर्भबारे सङ्क्षिप्त मन्तव्य राख्दै उपस्थित सबैलाई धन्यवाद ज्ञापन गरेकाे प्रभाव संवाददाताले बताएकाे छ । कार्यक्रममा समीक्षक माधव घिमिरे 'अटल' र रामप्रसाद सापकोटाले पनि कृति र कृतिकारको व्यक्तित्वबारे आआफ्ना भनाइ राखेका थिए । कार्यक्रमको सहजीकरण कवि तथा समालोचक लक्ष्मी रूम्बाले गरेकी थिइन् ।