काठमाडौं — गीतिकारितामा रमेश दाहाल स्थापित नाम हो । कविता लेखन हुँदै गीतिकारिता लागेका दाहाल २०५० सालयता निरन्तर गीत लेख्दै आएका छन् । उनले हालसम्म सयौँ गीत लेखिसकेका छन् ।
नेपाली गीतकार, साहित्यकार तथा संगीतकर्मीका माझमा छुट्टै पहिचान बोकेका गीतकार दाहालका थुप्रै कर्णप्रिय गीतहरू छन् । उनी भन्छन्, ‘स्रोताको मायाले पनि मलाई हौसला मिलेको छ ।’ दोलखाको बैतेश्वरमा जन्मेका उनी बालापनमै मातृवियोग भोगेका थिए । त्यसैले पनि उनी साहित्य फुर्न थाल्यो । गीतिकारितामा तीन दशकदेखि अनवरत उनी भन्छन्, ‘सुरुमा कविता र गीत लख्थेँ । तर, ०५० सालपछि अरु विधा छोडेर गीतमात्रै लेख्न थालेँ ।’
गीतकारहरूको छाता संस्था गीतकार संघ नेपालबाट यसै वर्ष ५७ हजार नगदसहित पुरस्कृत भएका दाहाल भन्छन्, ‘पहिलो सुरुवाती दिनदेखि ०५७ सालसम्म, दोस्रो ०५७ देखि ०७० सालसम्म र तेस्रो ०७० पछि हालसम्मको अवधिलाई संघर्ष, सफलता र प्राप्तिका हिसाबले लिएको छु ।’ उनका गीतहरू चर्चित छन् । तर, उनी आपूmले आफँैलाई एक सफल गीतकार भन्न आवश्यक ठान्दैनन् । नेपाली गीत लेखनमा छुटै स्थान बनाउँछु भनेर सपना देखेका उनले ०५७ सालसम्म विभिन्न अग्रज गीतकारहरूका गीतहरू गहन रूपमा अध्ययन गरेको बताउँछन् ।
विशेषतः कृष्णप्रसाद घिमिरे, रत्नसमशेर थापा, किरण खरेल, राजेन्द्र थापा, भैरवनाथ रिमाल कदमलगायतका अग्रज गीतकारबाट आफू प्रभावित भएको उनी बताउँछन् । ०५२ सालतिर पुल्चोक इन्जिनियरिङ क्याम्पसमा अध्ययन गर्दा कवि तथा गजलकार खड्गसेन ओली, कुसुम ज्ञवाली, दीपक कथितजस्ता अब्वल कवि एवं गजलकारहरूको संगत गरेका उनले त्यसबेलाका चर्चित गायक–गायिकाहरू जस्तै संजीव प्रधान, मोहन भुसाल, बबिन प्रधानहरूसँगको बाक्लो हिमचिम गरेको उनी स्मरण गर्छन् ।
०५७ सालपछि नेपालका शिद्धहस्त संगीतकर्मीहरूको कला र गलाबाट रमेशका गीतहरू नियमित आएका छन् । ‘फेरि तिम्रो सम्झनाले’ गणेश पराजुलीको संगीतमा गायिका यशोदा पराजुलीले गाएपछि रमेशका शब्दमा बनेका गीतहरू एकपछि अर्को नियमित रूपमा रेडियो तथा टेलिभिजनमा बज्न थालेका थिए । ०७० सालसम्म आइपुग्दा उनले नेपालका ख्यातिप्राप्त गायक–गायिका एवं संगीतकारहरूसँग सहकार्य गर्न भ्याइसकेको थिए ।
कतिपयले रमेशकै शब्दमा रेडियो नेपालको स्वर परीक्षा पास गरेका छन् । गायिका शितल र सुवानी मोक्तानले रमेशको गीतमा हिट्स एफएम म्युजिक अवार्ड, कमल श्रेष्ठले म्युजिक खबर म्युजिक अवार्ड, विजय थापाले बक्स अफिस म्युजिक अवार्ड, भोला पौडेलले नाट्यश्वर म्युजिक अवार्ड तथा सम्मानहरू प्राप्त गरेका छन् । गीतकार दाहालले यस अवधिमा काव्यात्मक गहिराइका गीतहरू लेखेका छन् ।
यसैले उत्कृष्ट गीतकारका हिसाबले उनले रेडियो नेपालबाट दोस्रो पटक पुरस्कृत हुने अवसर पाए । हालसम्म आइपुग्दा हजार अधिक गीत लेखिसकेका उनका तीनभन्दा बढी रेकर्ड भइसकेका छन् । यस्तै, तीन दर्जन एल्बममा गीत लेखेर योगदान दिएका रमेश निकै नै महँगो पारिश्रमिक लिने गीतकारका रूपमा चिनिएका छन् ।
