काठमाडौं– डिबी गुरुङको रचना, संगीत तथा स्वर रहेको ‘आयौँ हामी चारतारे बोकेर, जय नेपालको सलाम ठोकेर’ बोलको गीतको म्युजिक भिडिओ सार्वजनिक भएको छ । गीतमा गुरुङको साथै अर्जुन सुनाम र टीका पुनको पनि स्वर रहेको छ । सोमबार नेपाल सांस्कृतिक कलाकर्मी संघ राष्ट्रिय समितिले आयोजना गरेको ‘विमोचन समारोह–२०७८’ मार्फत कांग्रेसका सहमहामन्त्री डा. प्रकाशशरण महत, केन्द्रीय सदस्य तथा अनुशासन समितिका संयोजक भीष्मराज आङ्देम्बे, प्रतिनिधिसभा सदस्य सुजाता परियारलगायतले गीतको भिडिओ विमोचन गरेका हुन् । कार्यक्रममा रमाइलो टिभीका सञ्चालक तथा सञ्चारकर्मी दयाराम पाण्डे, नेपाली कांग्रेस दोलखाका कोषाध्यक्ष तथा नेपाल सांस्कृतिक संघका पूर्वप्रवक्ता कृष्ण केसी, महाधिवेशन प्रतिनिधि भगवती थापा, तेजप्रसाद रिजाल, म्युजिक भिडिओका निर्देशक लिगेस भट्टराई र नृत्य निर्देशक बुद्धिराम खड्काको उपस्थिति थियो ।
कार्यक्रममा सम्बोधन गर्दै प्रमुख अतिथि नेपाली कांग्रेसका सहमहामन्त्री तथा पूर्वपरराष्ट्रमन्त्री डा.महतले उक्त गीतको सपलताको कामना गरेका छन् । उनले एमाले र माओवादी केन्द्र मिलेर बनेको नेकपा बहुमतसहित सरकारमा आए पनि सरकारको नेतृत्व गरेको व्यक्तिले कामभन्दा बढी गफ गरेको स्मरण गराए ।
डा.महतले आगामी निर्वाचनमा जनताको मन छुने गीत÷संगीत लिएर जानुपर्ने बताए । उनले भने, ‘हामीले त काम नै गरेको हो नि । जनताको सेवामा केन्द्रित भएर कांग्रेस समर्पित हुनुपर्छ । भाषणको जति प्रभाव हुन्छ, त्यो भन्दा पनि सयौँ गुण बढी प्रभाव गीत तथा संगीतको हुन्छ । अहिले कांग्रेको सरकारले यसअघिको सरकारले बिगारेको राजनीतिलाई सही ट्र्याकमा ल्याएको छ । हाम्रो यो सरकार आकाश र पातालको कुरा गर्दैन । बरु, जनताको आवश्यकता प्राथमिकतमा केन्द्रित भएर काम गर्छौँ । यही प्रण प्रधानमन्त्रीज्यूले गर्नुभएको छ ।’
उनले प्रधानमन्त्री शेरबहादुर देउवाले कोभिडबाट देश र जनतालाई बचाउने भनेर सार्वजनिक रूपमै प्रतिबद्धता व्यक्त गरेको सुनाए ।
कांग्रेसले कम्युनिस्टबाट सिक्ने दुई वटा कुरा भएको पनि उनले उल्लेख गरे । पहिलो कुरा भनेको संगठन निर्माण र अर्को प्रचार भएको उनको भनाइ छ ।
कार्यक्रममा नेपाली कांग्रेसका केन्द्रीय सदस्य तथा अनुशासन समितिका संयोजक भीष्मराज आङदाम्बेले पनि गीतको सफलताको कामना गरे ।
उनले कम्युनिस्टहरूले गरिबको गीत गाएर मन जितेको पनि स्मरण गराए । उनले भने, ‘कम्युनिस्ट हृदयदेखि गाँसिएको नाम होइन । अहिले कांग्रेस इतिहासकै महत्वपूर्ण जिम्मेवारी बोकेर आएको छ, हाम्रो पार्टी सरकारमा छ । दुई तिहाईको मत पाएको नेकपाले सरकार चलाउन सकेन । ठट्टाठट्टै गर्दा तीन वर्ष बिताउने काम ग¥यो ।’ उनले सरकारले देश र जनतालाई केन्द्रविन्दुमा राखेर काम गर्ने पनि विश्वास दिलाए । कार्यक्रममा बोल्दै प्रतिनिधिसभा सदस्य सुजाता परियारले पनि गीतको सफलताको कामना गरिन् ।
उनले विमोचन गरिएको उक्त गीत नेपाली कांग्रेसलाई बलियो बनाउने सहयोगी हुने पनि बताइन् । उनले भनिन्, ‘यो गीतको माध्यमबाट कांग्रेसलाई सशक्त बनाउने र गाउँ, कुना, कन्दरा र विश्वमा पु¥याउने भन्ने लागेको छ । यो गीत हरेकनेपाली जनताको मन मनमा पुग्ने छ भन्ने मैले विश्वास लिएको छु । कांग्रेसको सन्देशमूलक गीत भएको महशुस गरेको छु ।’
कार्यक्रममा वरिष्ठ गायक, संगीतकार तथा गीतकार डिबी गुरुङले गीत विमोचन कार्यक्रममा सहभागीहरूप्रति आभार व्यक्त गरे । उनले कलाकारलाई पनि पार्टीले उचित जिम्मेवारी दिनुपर्ने सुझाए । उनले कांग्रेसमा अब कलाकारको मर्म र भावना बुझ्ने नेतृत्व आओस भन्ने इच्छा व्यक्त गरे ।
