नेपाललाई विश्वमाझ चिनाउने र विश्वभर छरिएर रहेका नेपालीलाई जोड्ने माध्यम बनेको क्रिकेट । अन्य खेलमा कमजोर नेपालले एकमात्र क्रिकेटबाट लगातार सफताको खुड्किलो उक्लिरहेको छ । नेपाल र नेपालीलाई गौरवान्वित बनाइरहेको नेपाली क्रिकेट टोलीले आज अर्को ऐतिहासिक यात्रा सुरु गर्दै छ । भारत र श्रीलंकामा शनिबारबट सुरु भएको आइसिसी पुरुष टि–ट्वान्टी विश्वकप–२०२६ मा नेपालले आज पहिलो खेल खेल्दै छ । यो खेलले नेपालीहरुको मात्रै नभई विश्वभरका क्रिकेटप्रेमीहरुको ध्यान आकार्षित गरेको छ ।
प्रतियोगिताअन्तर्गत आफ्नो पहिलो खेलमा आज नेपालले बलियो प्रतिस्पर्धीसँग खेल्दै छ । ‘टेस्ट म्याच’मा स्थापित इंग्ल्याण्डसँगको पहिलो खेल नेपालका लागि निकै नै महŒवपूर्ण हुने निश्चित छ । यो खेलमा जितका लागि खेलाडीहरु निकै उत्साहित देखिन्छन् । मुम्बईस्थित वानखेडे रंगशालामा हुने खेलमा पक्कै पनि यो उत्साहको सुखद नतिजा देखिने छ । विश्वभरबाट नेपालीहरुले हाम्रा खेलाडीहरुलाई थप उत्साह जगाउनुपर्ने छ । भारतमा रहेका नेपालीहरुका साथै नेपालबाट पनि क्रिकेटप्रेमीहरु पक्कै वानखेडे रंगशालामा पुग्ने छन्, खेलाडीहरुलाई हौसला प्रदान गर्न । आशा गरौं इंग्ल्याण्डविरुद्ध नेपालले चमत्कार गर्ने छ ।
विश्वकपमा नेपालको यो तेस्रोपटक सहभागिता हो । त्यसैले विगतको भन्दा अझ उत्कृष्ट नतिजा हासिल गर्ने अपेक्षा गर्न सकिन्छ । यद्यपि, चुनौती सहज छैन नेपालका लागि । समूह ‘सी’ मा इंग्ल्याण्डसँगको प्रतिस्पर्धाबाट जस्तोसुकै नतिजा आए पनि नेपालको प्रदर्शन पक्कै उत्कृष्ट रहने छ । कठिन यात्रा पार गर्दै विश्वकपमा स्थान बनाएको नेपालले लिग चरण पार गर्दै सुपर आठमा पुग्ने लक्ष्य राखेको छ । यसका लागि इंग्ल्याण्डसँगै वेस्ट इण्डिज, स्कटल्याण्ड र इटालीसँगको खेलमा उत्कृष्ट नतिजा ल्याउन आवश्यक छ । नेपालले माघ २९ गते इटालीसँग, फागुन ३ गते वेस्ट इण्डिजसँग र फागुन ५ गते स्कटल्याण्डसँग चौथो खेल खेल्ने छ ।
विश्वकप यस्तो प्लेटफर्म हो, जहाँ विश्वकै उत्कृष्ट टिमहरुबीच प्रतिस्पर्धा हुन्छ । ती टिमहरुमध्येमा नेपाल पनि एक हुनु नै गर्वको कुरा हो । नेपाली क्रिकेट टोलीमा हाल कायम आत्मविश्वास, दृढता र अनुशासन नै सबैभन्दा बलियो पक्ष हो । त्यसलाई निरन्तरता दिँदै खेलाडीहरुले थप मिहेनत गरेमा सफलता निश्चित हुने छ । राष्ट्रलाई नै गौरवान्वित बनाउने क्रिकेट टोलीलाई सफलताका लागि हार्दिक शुकामना ।
