काठमाडौं- पत्रकार एवं युवा लेखक क्षितिज समर्पणको पहिलो उपन्यास ‘तोरकीन’ बजारमा आएको छ ।
माथिल्लो मुस्ताङमा बसाइँसराइले पारेको प्रभावबारे अनुसन्धान गरी लेखिएको तोरकीनलाई बुकहिलले हालै बजारमा ल्याएको हो ।
लेखकका अनुसार माथिल्लो मुस्ताङको जन्म, विवाह, मृत्यु संस्कार, रहनसहन, बसाइँसराइ, संस्कृति, परम्परा तथा गुम्बा र दरबारको सामाजिक, सांस्कृतिक एवं भौगोलिक इतिहासको कथालाई खोज-अनुसन्धान गरी मिथकीय शैलीमा उपन्यासमा प्रस्तुत गरिएको छ । ‘मैले रित्तिँदै गएका बस्ती, पग्लिँदै गरेका हिमाल, चिसिँदै गएका सम्बन्ध, हराउँदै गएका संस्कार, परम्परा र संस्कृतिको कथा लेखेको हुँ । यस उपन्यासमार्फत पाठकलाई फेरि मानव सभ्यताको जरामा फर्काउने कोसिस गरेको छु,’ लेखक समर्पणले भने ।
उपन्यासमा छेवाङ र कुन्साङ मुख्य पात्रमार्फत तीन पुस्ताको कथाभित्र मानव जीवनमा आउने आरोह अवरोह तथा सपना र सम्बन्धहरूको यथार्थपरक चित्रण गरिएको छ ।
स्थानीय ल्होवा भाषामा ‘तोरकीन’को अर्थ हराउँदै जानु वा लोप हुनु हो । सरल र काव्यात्मक भाषाशैली तथा पात्रहरूको कथ्यशैलीको स्थानीय लवजले उपन्यासलाई अझै रूचिकर र पठनीय बनाएको छ ।
महत्त्वाकांक्षी किताबहरूको सूचीमा प्रकाशन गरिएको यस उपन्यासमार्फत नेपाली साहित्यमा एक उम्दा नयाँ लेखकको उदय भएको प्रकाशक बुकहिलले जनाएको छ ।
जाजरकोटमा जन्मिएका लेखक समर्पण गीत, गजल र आख्यान लेखनमा सक्रिय छन् । उनी ‘बाह्रखरी कथा लेखन प्रतियोगिता’ (२०७६ र २०७७) पुरस्कृत भएका थिए । उनी दशौं राष्ट्रिय खेलगीतका रचनाकारसमेत हुन् ।
कूल ३३६ पृष्ठको पुस्तकको बजार मूल्य ६६६ रूपैयाँ रहेको छ ।
