काठमाडौं – युएई -संयुक्त अरब इमिरेट्स (UAE) सरकारले सन् २०१९ मा सुरु गरेको चर्चित ‘गोल्डेन भिसा’ कार्यक्रमलाई हाल प्रविधि, नवप्रवर्तन र दीर्घकालीन जनशक्ति विकासतर्फ केन्द्रित गर्दै थप परिमार्जन गरेको छ। सुरुमा लगानीकर्ता र रियल स्टेट खरिदकर्तालाई लक्षित यो योजना अहिले आर्टिफिसियल इन्टेलिजेन्स (AI), जलवायु प्रविधि (Climate Tech), क्लाउड कम्प्युटिङ, डिजिटल वित्त तथा अन्य उच्च प्रविधिमा दक्ष जनशक्तिलाई आकर्षित गर्न केन्द्रित छ।
युएई सरकारले विभिन्न क्षेत्रका दक्ष र विशेष प्रतिभा भएका व्यक्तिहरूलाई लक्षित गर्दै "गोल्डेन भिसा" कार्यक्रमलाई विस्तार गरेको छ। यस योजनाअन्तर्गत विदेशीसम्मलाई ५ देखि १० वर्षसम्म युएईमा स्थायी बसोबासको अनुमति दिइन्छ।गोल्डेन भिसा प्रविधि, स्वास्थ्य, शिक्षा, व्यवसाय, खेलकुद, संस्कृतिकर्मी, वैज्ञानिक तथा नवप्रवर्तनकर्ता लगायत उच्च क्षमतावान व्यक्तिहरूका लागि दिइने विशेष प्रकारको दीर्घकालीन भिसा हो।
यस भिसाले उनीहरूलाई बिना प्रायोजक युएईमा बस्न, काम गर्न र अध्ययन गर्न सक्ने अवसर दिन्छ।सरकारको अनुसार, विदेशी लगानीकर्ताहरू, उत्कृष्ट शैक्षिक उपलब्धि हासिल गरेका विद्यार्थीहरू, उद्यमी, र मानव संसाधन विकासमा योगदान पुर्याउने व्यक्ति समेत यो योजनाबाट लाभान्वित हुनेछन्।यो नीतिअन्तर्गत भिसा पाउने व्यक्तिको परिवारका सदस्यहरू (पति/पत्नी र बच्चाहरू) लाई पनि साथमा बस्न सकिने सुविधा प्रदान गरिएको छ।विशेष गरी पछिल्लो समयमा नेपाली समुदायमा समेत यो भिसा प्रति आकर्षण बढ्दो छ।
२०२३ मा एक लाख ५८ हजार भिसा, प्राविधिक जनशक्तिमा उच्च प्राथमिकता
दुबई सरकारले २०२३ मा मात्र १ लाख ५८ हजार गोल्डेन भिसा जारी गरेको छ। तीमध्ये ठूलो संख्यामा एआई, क्लाइमेट टेक र अन्य नवप्रवर्तन क्षेत्रमा कार्यरत विज्ञहरू रहेका छन्। यूएईले अब केवल लगानीमार्फत होइन, देशको दीर्घकालीन आर्थिक लक्ष्यसँग मेल खाने उच्च क्षमतायुक्त मानव संसाधनलाई प्राथमिकता दिइरहेको छ।
यूएईको संस्कृति मन्त्रालय, खेलकुद मन्त्रालय, आबुधाबी रेसिडेन्ट्स अफिस लगायतका सरकारी निकायहरूलाई गोल्डेन भिसा छनोट र अनुमोदन प्रक्रियामा संलग्न गरिएको छ। यसले कार्यक्रमलाई विविध पेशागत क्षेत्र समेट्ने बनाएको छ।
यो भिसा अब वैज्ञानिक, उत्कृष्ट विद्यार्थी, कोडर, निजी सम्पत्ति व्यवस्थापक, अन्तर्राष्ट्रिय विश्वविद्यालयका स्नातक, एआई एथिक्स विशेषज्ञ, क्लाइमेट इन्जिनियरिङ तथा ग्रिन फाइनान्समा काम गर्ने व्यावसायिकसम्म फैलिएको छ। पछिल्ला ६ महिनामा २५० भन्दा बढी व्यक्तिले गोल्डेन भिसा पाएका छन्।
गोल्डेन भिसा प्राप्त व्यक्तिहरू कुनै एक रोजगारदाता सीमित रहनु पर्दैन। उनीहरूले उद्यमशीलता, स्टार्टअप सञ्चालन वा स्वतन्त्र परामर्शकर्ताका रूपमा पनि कार्य गर्न सक्छन्। १० वर्षसम्मको दीर्घकालीन बसोबास, परिवारसहित बस्न सकिने सुविधा, तथा ब्याजमुक्त रिन्यूअल प्रणाली यो भिसाको विशेषता हो। अझ रोचक कुरा, प्रारम्भिक लगानी फिर्ता गरे पनि भिसा मान्य रहन्छ।
यूएईमा हाल विश्वका शीर्ष २० हेज फन्डमध्ये ८ स्थापना भइसकेका छन्, जसले करिब ४८ अर्ब अमेरिकी डलर बराबरको कारोबार गरिरहेका छन्। यसले गर्दा सीईओ, सीटीओ, एआई डेभलपर, क्लाउड स्पेसलिस्ट, प्राइभेट बैंकर र डिजिटल रणनीतिज्ञको माग निकै बढेको छ।
नेपालका लागि अवसर
यूएईस्थित नेपाली कन्सुलर सेवा कार्यालयका अनुसार नेपाली जनशक्तिका लागि पनि यो योजना अवसरविहीन छैन। दक्ष पेशेवर, प्रविधिमा कार्यरत व्यक्ति, अन्तर्राष्ट्रिय विश्वविद्यालयमा पढाइ पूरा गरेका विद्यार्थीहरू, तथा स्वास्थ्य, खेलकुद वा कलामा विशिष्ट योगदान पुर्याउने नेपालीले गोल्डेन भिसा प्राप्त गर्न सक्ने सम्भावना उच्च छ।
यूएईको गोल्डेन भिसा योजना अब केवल पूँजी लगानी होइन, ज्ञान, प्रतिभा र नवप्रवर्तनमा आधारित छ। नेपाली जनशक्तिका लागि यो योजना वैदेशिक रोजगारको परम्परागत ढाँचाबाट प्रविधि र पेशागत विकासतर्फको सार्थक मोड हुन सक्छ। यदि तपाईं पेशेवर दक्षता, शिक्षा वा नवप्रवर्तनको क्षेत्रमा छन् भने, गोल्डेन भिसा भविष्य बनाउने ढोका हुन सक्छ।
