रोम- रोमको ऐतिहासिक मध्ययुगीन टावर ‘टोर्रे देई कोन्ती’ (Torre dei Conti) को एक भाग खसेपछि भग्नावशेषमा थुनिएका एक मजदुरको मृत्यु भएको पुष्टि गरिएको छ।घटनापछि झन्डै १२ घण्टापछि उद्धार टोलीले बाहिर निकालिएका मजदुरको मृत्यु भएको हाे ।
अस्पतालका अधिकारीहरूका अनुसार ६६ वर्षीय अक्टाभ स्त्रोइची (Octav Stroici) लाई घटनापछि स्थानीय समयअनुसार राति ११ बजे उद्धार टोलीले बाहिर निकालेका थिए। तर उद्धारपछि एम्बुलेन्समा नै उनको मुटु धड्कन बन्द भएको र अस्पताल पुर्याएपछि पनि चिकित्सकहरूले बचाउन नसकेको जनाइएको छ।
यो दुर्घटना रोमको प्रसिद्ध “Roman Forum” क्षेत्रको किनारमा अवस्थित टावरको एक भाग भत्किएपछि भएको हो। यो ठाउँ कोलोसियम (Colosseum) नजिकै पर्ने ऐतिहासिक तथा पर्यटक आकर्षण क्षेत्र हो। रोमानियाको परराष्ट्र मन्त्रालयले अक्टाभ स्त्रोइची रोमानियाका नागरिक भएको पुष्टि गरेको छ। यस घटनामा घाइते भएका तीन जनामध्ये अर्का एक मजदुर पनि रोमानियाली नागरिक रहेको बताइएको छ।
उद्धारमा संलग्न एक अधिकारीले भने, “हामीले अन्तिम क्षणसम्म बचाउने आशा त्यागेको थिएनौँ, तर दुर्भाग्यवश हामी सफल हुन सकेनौँ।”दुर्घटनाको कारणबारे अनुसन्धान जारी रहेको इटालीका अधिकारीहरूले बताए।
स्राेत : बीबीसी
