क्वालालम्पुर - अवैध लागुऔषध सेवन तथा राखेको आरोपमा चर्चित मलेसियाली र्यापर नेमवीलाई अदालतमा मुद्दा दायर गरिएको छ।र्यापर नेमवीलाई एक होटल कोठाबाट पक्राउ गरेकाे क्वालालम्पुर प्रहरीले जनाएकाे हाे ।
क्वालालम्पुर प्रहरीअनुसार ४२ वर्षीय नेमवीलाई गत महिनाको अन्त्यतिर एक होटल कोठाबाट पक्राउ गरिएको थियो। पक्राउको क्रममा प्रहरीले ईक्स्टेसी ९भ्अकतबकथ० जस्तै देखिने चक्कीहरू फेला पारेको बताइएको छ। ती चक्कीहरूको प्रयोगशालामा परीक्षण भइरहेको र परीक्षणपछि मात्र उक्त पदार्थ पूर्ण रूपमा लागुऔषध हो वा होइन भन्ने निश्चित हुने जनाइएको छ।
नेमवीले अदालतमा दुवै आरोपमा आफू निर्दोष रहेको दाबी गरेका छन्। उनलाई धरौटीमा रिहा गरिएको भए पनि मुद्दाको छानबिन प्रक्रिया जारी रहेको छ।नेमवीले आइतबार आफ्नो इन्स्टाग्राममार्फत वक्तव्य जारी गर्दै आफूले कहिल्यै अवैध लागुऔषध नसेवन गरेको र नबोकेको दाबी दोहोर्याए। उनले भने, “मेरो नाममा चलाइएका सबै आरोप झुटा हुन्। म सत्य प्रमाणित हुन्छ भनेर आशावादी छु।”
नेमवी मलेसियाली संगीत क्षेत्रका चर्चित कलाकार मात्र नभई फिल्म निर्देशक र यूट्युबर पनि हुन्। सामाजिक विषयमा व्यंग्य र विवादास्पद गीतमार्फत चर्चामा आउने उनको शैली चर्चित छ। यसअघि पनि उनले आफ्नो केही गीत र फिल्मको सामग्रीका कारण सरकारसँग विवाद झेलेका थिए।
प्रहरीका अनुसार, यदि अदालतले लागुऔषध सेवन वा राखेको अपराधमा दोषी ठहर गरेमा उनलाई कैद तथा जरिवाना दुवै सजाय हुन सक्छ। मामिलो हाल पनि अनुसन्धानमै रहेको छ र थप प्रमाण तथा परीक्षण रिपोर्ट सार्वजनिक भएपछि मात्र अदालतको अघि सुनुवाइ अगाडि बढ्ने बताइएको छ।
