काठमाडौं– कुवेतमा आज (मंगलबार) बाट लागू हुने बहिर्गमन अनुमति (एक्जिट पर्मिट) करिब २२ हजार जनाले पाएका छन् । आजबाट निजी क्षेत्रमा कार्यरत आप्रवासी श्रमिकले कुनै कारणबस मुलुक छोड्न परेमा अनिवार्यरुपमा एक्जिट पर्मिट लिनुपर्ने छ । यो प्रावधानले गैरकानुनीरुपमा कुवेत छिर्ने र त्यहाँबाट बाहिरिने प्रवृत्तिको नियन्त्रण गर्दै श्रमबजारलाई सुरक्षित बनाउने त्यहाँको सरकारले जनाएको छ । आर्थिक तथा कानुनी दायित्व पूरा नगरी मुलुक छोड्नेहरुलाई समेत यसले नियन्त्रण गर्ने जनाइएको छ ।
कुवेतको सार्वजनिक श्रम प्राधिकरणका अनुसार प्राधिकरणको वेबसाइट र साहेल एपबाट करिब २२ हजार जनाले मुलुक छोड्ने अनुमति पाएका छन् । स्वदेश फर्किन चाहने व्यक्तिले अनुमति लिनका लागि साहेल एप वा प्राधिकरणको वेबसाइटमा गई सिभिल आइडी र आफ्नो व्यक्तिगत विवरणहरु राख्नुपर्छ । त्यसपछि रोजगारदाताले साहेल बिजनेस एप वा सोही एपमार्फत स्वीकृतिको प्रक्रिया अघि बढाउँछन् । त्यसपछि सिस्टमले रोजगारदाता र रोजगारकर्ताको अवस्थाको प्रमाणीकरण गरेर अनुमति दिन्छ ।
त्यहाँका अधिकारीहरुका अनुसार डिजिल पर्मिट सिस्टमलाई २४सै घण्टा र हप्ताको सातै दिन सञ्चालन गरिने छ । ढिलासुस्ती नहोस् भनेर साप्ताहिक बिदा र चाडवाडको समयमा पनि काम भने हुने जनाइएको छ । यदि प्राविधिक समस्या आएमा प्राधिकरणको नजिकैको शाखामा तत्कालै खबर गर्न भनिएको छ । मुलुक छोड्नुभन्दा सात दिन र २४ घण्टाको विचमा बहिर्गमन अनुमति लिएको हुनुपर्ने जनाइएको छ ।
कुवेतमा सरकारी क्षेत्रमा कार्यरतहरुले देश छोड्नुअघि मन्त्रालयबाट बहिर्गमन अनुमति लिनुपर्ने प्रावधान भए पनि निजी क्षेत्रका लागि यस्तो प्रावधान पहिलोपटक कार्यान्वयनमा ल्याइएको हो । यसअघि रोजगारीमा गएका श्रमिक कुनै पनि बेला मुलुक छोड्न सक्थे । यो प्रावधानको समर्थनमा सूचना जारी गर्दै जजिरा एयरलाइन्सले पनि अनुमति नलिएको यात्रुहरुले यात्रा गर्न नपाइने भनेको छ । कुनै कागजात नपुगेर उडान रद्द भए यसको जिम्मेवार एअरलाइन्स नहुने जनाएको छ ।
यद्यपि, यो नयाँ प्रावधानले भने मिश्रित प्रतिक्रिया पाइरहेको छ । कतिपयले यसले मनोमानी ढंगले हुने श्रमिकहरुको अनुपस्थितिलाई हटाएर व्यावसायिक निरीक्षण गर्ने बताएका छन् । कतिपयले भने प्रशासनिक भारलाई बढाउने बताएका छन् । श्रमिकहरुले भने अनावश्यक प्रतिबन्धले समस्या हुनसक्ने भन्दै चिन्ता व्यक्त गरेका छन् । यसको दुरुपयोग र यसबाट यात्रामा हुनसक्ने ढिलासुस्तीलाई नियमन गर्नुपर्ने पनि केहीको टिप्पणी छ ।
नेपालीहरुको समेत प्रमुख श्रम गन्तव्यको रुपमा रहेको कुवेतमा गत आर्थिक वर्ष २०८०/८१ मा ४० हजार ३६८ जना युवाहरु व्यक्तिगत, संस्थागत र पुनः श्रम स्वीकृति लिएर कुवेत गएका तथ्यांक छ । नेपालीहरु घरेलु श्रमिकदेखि अर्धदक्ष र दक्ष श्रमिकको रुपमा कुवेत जाने गरेका छन् ।
