- चालु आवको तीन महिनामा सबैभन्दा बढी युएईमा गएको तथ्यांक, मलेसिया पाँचौंमा
- धनुषाबाट सबैभन्दा बढी नौ हजार ६१५ जना रोजगारीमा गएको तथ्यांक
काठमाडौं – चालु आर्थिक वर्षको तीन महिनामा सबैभन्दा बढी वैदेशिक रोजगारीमा जाने युवाहरुको प्रमुख रोजगार गन्तव्य संयुक्त अरब इमिरेट्स (युएई) बनेको छ । वैदेशिक रोजगार विभागले सार्वजनिक गरेको तथ्यांकअनुसार गत साउनदेखि असोज महिनाको अवधिमा ६७ हजार ५०२ जना युएईमा रोजगारीका लागि गएका हुन् । यो संख्या संस्थागत, व्यक्तिगत र पुनः श्रम स्वीकृति लिएर जानेहरुको हो ।
गत भदौ २३ र २४ गतेको जेन–जी आन्दोलनपछि भने युएईले श्रमिक भिसा बन्द गरिदिएको छ । जसकारण असोज महिनामा अघिल्ला दुई महिनाको तुलनामा युएई जाने कामदारको संख्या घटेको छ । हाल आन्दोलनअघि नै भिसा लागेकाहरु मात्र गइरहेको व्यवसायीहरु बताउँछन् ।
साउनमा २३ हजार ८३८ र भदौमा २५ हजार १२८ युएई जाँदा असोजमा १८ हजार ४६६ जनामा सीमित हुन पुगेको तथ्यांकमा देखिन्छ । असोजमा संस्थागत माध्यमबाट सात हजार २३७ जनामात्र गएका छन् । जबकि, साउनमा १५ हजार ३१४ र भदौमा १७ हजार ४०६ जना संस्थागत माध्यमबाट गएका थिए ।
तीन महिनामा युएई गएकाहरुमध्ये ५८ हजार ३९६ जना पुरुष र नौ हजार १०६ जना महिला रहेका छन् । त्यसैगरी, ३९ हजार ९५७ संस्थागत, सात हजार २१७ जना व्यक्तिगत र २० हजार २३३ जना पुनः श्रम स्वीकृति गरेर गएका हुन् । यस अवधिमा युएईपछि बढी श्रमिक कतार गएका छन् । साउन, भदौ र असोजमा ३३ हजार ४८३ जना कतार गएका तथ्यांक छ । जसमा ३० हजार ६४९ जना पुरुष र दुई हजार ८३४ जना महिला छन् ।
तेस्रोमा, २८ हजार ८७७ जना श्रमिक साउदी अरब गएका छन् । साउदी गएकामध्ये २८ हजार ७०१ जना पुरुष र १७६ जना महिला छन् । साउदीपछि मलेसियामा १८ हजार ६६६ जना गएका छन् । जसमा १८ हजार ३८५ जना पुरुष र २८१ जना महिला छन् ।पाँचौंमा परेको कुवेतमा उक्त अवधिमा १२ हजार २८९ जना रोजगारीका लागि गएको देखिन्छ । जसमा आठ हजार ९६० जना पुरुष र तीन हजार ३२९ जना महिला छन् ।
वैदेशिक रोजगारीका लागि नयाँ गन्तव्य मुलुकहरु पहिचान भए पनि प्रमुख रोजगार गन्तव्य खाडी मुलुक नै बनेका छन् । यी पाँच मुलुकपछि रोमानिया, जापान, कोरिया, क्रोएसिया, साइप्रस लगायतका मुलुक जानेहरुको संख्या बढी छ ।यस आवको पहिलो तीन महिनामा सबैभन्दा बढी धनुषा जिल्लाबाट रोजगारीमा गएका छन् । उक्त जिल्लाबाट नौ हजार ६१५ जना रोजगारीमा गएको तथ्यांक छ । जसमा नौ हजार ५१५ जना पुरुष र १०० जना महिला छन् ।
धनुषापछि झापा, सिरहा, मोरङ, महोत्तरीलगायतका जिल्लाबाट रोजगारीमा जानेहरु बढी छन् । सोही अवधिमा सबैभन्दा कम मनाङबाट ६४ जना गएका छन् । जसमा४९ जनापुरुष र १५ जना महिला छन् ।
