काठमाडौं– चालु आर्थिक वर्ष २०८१÷८२ को ११ महिनामा वैदेशिक रोजगार बोर्डबाट छ हजार ९७२ जनाले विभिन्न कल्याणकारी सेवा लिएका छन् । वैदेशिक रोजगारीमा गएका श्रमिक र तिनका परिवारलाई बोर्डले विभिन्न सेवा दिँदै आएको छ ।
बोर्डले सार्वजनिक गरेको तथ्यांकअनुसार चालु आवको साउनदेखि जेठसम्म एक हजार ३३३ जनाले रोजगारीको सिलसिलामा ज्यान गुमाएका छन् । मृत्यु भएकाको परिवारलाई बोर्डले आर्थिक सहायताबापत कूल ८७ करोड ८२ लाख ७५ हजार रुपैयाँ दिएको छ । यो अवधिमा ४१० वटा शव विदेशबाट झिकाइएको छ भने ८०६ वटा शव विभागले मृतकको घरसम्म ढुवानी गरिदिएको बोर्डले सार्वजनिक गरेको विवरणमा उल्लेख छ । शव झिकाउन दुई करोड ८५ लाख २९ हजार रुपैयाँ खर्च भएको बोर्डले जनाएको छ । यस्तै दुई करोड ७९ लाख ७८ हजार रुपैयाँ शव ढुवानीमा खर्च भएको जनाइएको छ ।
यो ११ महिनाको अवधिमा सबैभन्दा बढीले सन्तति छात्रवृत्तिसम्बन्धी सेवा पाएका छन् । कूल तीन हजार २४५ जनाले छात्रवृत्ति पाएका छन् । रोजगारीमा गएका श्रमिकको मृत्यु या अंगभंग भए या गम्भीर प्रकृतिको रोग लागे उनीहरुका सन्ततिलाई विद्यालयस्तरमा छात्रवृत्ति दिइन्छ । ११ महिनामा दुई करोड ९७ लाख २० हजार रुपैयाँ बराबरको छात्रवृत्ति दिइएको छ । बोर्डले रोजगारीमा गएका व्यक्तिको कक्षा आठसम्म अध्ययन गर्ने छोराछोरीलाई वार्षिक आठ हजार रुपैयाँ र नौदेखि १२ कक्षासम्म अध्ययन गर्नेलाई वार्षिक १२ हजार रुपैयाँ दिँदै आएको छ ।
बोर्डले रोजगारीका क्रममा अंगभंग र गम्भीर बिरामी भएका ६१२ जना श्रमिकलाई आर्थिक सहायता दिएको छ । त्यस्ता श्रमिकहरुले १६ करोड ५१ लाख ५९ हजार रुपैयाँ पाएका छन् । त्यस्तै पारिवारिक उपचार खर्च ३३४ जनाले लिएका छन् । रोजगारीमा गएका श्रमिकका परिवारका सदस्य करार अवधिभित्र गम्भीर प्रकृतिका बिरामी परेर उपचार गराउन आर्थिक समस्या परे बोर्डले एक पटक ५० हजार रुपैयाँसम्म दिन्छ । परिवारमा कसैलाई पार्किन्सन, क्यान्सर, मिर्गौला प्रत्यारोपण, मुटुको शल्यक्रिया तथा अल्जाइमरजस्ता गम्भीर प्रकृतिका रोज लागे सहयोग पाइन्छ । यो अवधिमा बोर्डले एक करोड १७ लाख १० हजार रुपैयाँ सहायतास्वरुप प्रदान गरेको छ ।
उक्त अवधिमा रोजगारमा गएका १८७ जनाको उद्धार तथा खोजतलास गरिएको बोर्डले जनाएको छ । विदेशमा कानुनी सजाय पाएका, दुर्घटनामा परेका या विभिन्न कारणले आर्थिक अभाव भई अलपत्र परेको श्रमिकलाई बोर्डले उद्धार गर्दै आएको छ । बोर्डले यसमा ११ लाख रुपैयाँ खर्च गरेको छ । गत जेठ महिनामा मात्र बोर्डले ११६ जना मृतकका परिवारलाई आर्थिक सहायता दिएको छ । उक्त एक महिनामा ३५ वटा शव झिकाइदिएको र ४३ वटा शव घरसम्म ढुवानी गरिदिएको बोर्डले जनाएको छ । त्यस्तै ३१ जनाले पारिवारिक उपचार खर्च लिएका छन् । अंगभंग तथा गम्भीर बिरामी भएका ४१ जना कामदारले सहायता पाएका छन् ।
त्यस्तै सन्तती छात्रवृत्ति कार्यक्रमअन्तर्गत ४५ जनाले छात्रवृत्ति पाएका छन् ।रोजगारीमा भएका श्रमिकको स्वास्थ्यमा समस्या देखापरे अनलाइन माध्यमबाट स्वास्थ्य परामर्श दिइँदै आएको छ । जेठ महिनामामात्रै यस्तो टेलिमेडिसिन सेवा ४११ जनाले लिएका छन् । रोजगारीसँग सम्बन्धित विभिन्न जिज्ञासा, गुनासो र समस्यासम्बन्धी सेवा लिनेहरु छ हजार ९६२ जना छन् । त्यस्तै बोर्डले कल सेन्टरबाट दुई हजार ६६९ जनालाई परामर्श सेवा प्रदान गरेको जानकारी दिएको छ ।
०००
अभिमुखीकरण तालिम प्रदायकको देशगत क्लस्टर सार्वजनिक
काठमाडौं (प्रस)– वैदेशिक रोजगार विभागले वैदेशिक रोजगारीमा जानुअघि दिइने पूर्वप्रस्थान अभिमुखीकरण तालिम प्रदायक संस्थाहरुको देशगत क्लस्टर सार्वजनिक गरेको छ । शुक्रबार विभागले सूचना जारी गर्दै तालिम प्रदायक संस्थाको मागबमोजिम संस्थाको नाम र क्लस्टर सार्वजनिक गरेको जनाएको छ ।
विभागले १४३ वटा तालिम प्रदायक संस्था, तिनको ठेगाना र क्लस्टर सार्वजनिक गरेको हो । ती संस्थाले छ वटा क्लस्टरमध्येबाट छनोट गरेका छन् । जसमा खाडी मुलुकका लागिमात्र अभिमुखीकरण दिने संस्था ९० वटा रहेका छन् । अन्य र युरोपेली मुलुक भनिएको क्लस्टरमा २३ वटा संस्था छन् । मलेसियाका लागिमात्र अभिमुखीकरण दिने संस्था १४ वटा छन् । जापान र दक्षिण कोरियाको क्लस्टरमा नौ वटा, मध्यपूर्वका देशको क्लस्टरमा एउटा संस्थाले तालिम दिने भएको छ ।
विभागका अनुसार तीनवटा संस्थाले भने दुईवटा क्लस्टर छनोट गरेको पाइएको छ । इजरायल र अन्य तथा युरोपेली मुलुक छनोट गर्ने संस्था एउटा रहेको छ । त्यस्तै खाडी र मध्यपूर्वी एसियाका लागि एउटा तथा खाडी, जापान र दक्षिण एसियाका लागि तालिम दिने संस्था एउटा रहेको छ । तीनवटा संस्था भने निस्क्रिय रहेको सूचनामा उल्लेख गरिएको छ ।
अभिमुखीकरण कक्षालार्ई विशिष्टीकृत बनाउन र श्रमिकलाई गन्तव्य मुलुकको बारेमा विस्तृत जानकारी दिन क्लस्टर छुट्याइएको विभागको भनाइ छ । विभागले कुनै संस्थालाई एकभन्दा बढी क्लस्टर दियो भनेर केही अभिमुखीकरण व्यवसायीले विगतमा असन्तुष्टि जनाउँदै आएका थिए । तर अत्यन्तै न्यून संख्यामा श्रमिक जाने मुलुकको क्लस्टर व्यवसायीले छनोट गर्न नमानेको अवस्थालाई मध्यनजर गर्दै सन्तुलन कायम गर्न एकभन्दा बढी क्लस्टर दिइएको विभागले जनाएको थियो ।
