- दैनिकजसो भाषणमा रमाउन थालेकै कारण ओलीसँगै एमालेले जनविश्वास गुमाउँदै छ
- सहयात्री र सबैभन्दा ठुलो दल नेपाली कांग्रेस भने टुलुटुलु हेरेर बसेको छ
- कांग्रेस सभापति शेरबहादुर देउवा प्रधानमन्त्री बन्ने दिनको पखाईमा बस्दा ओलीको हुकुमी शैलीका कारण अरु नेतामा भने छटपटी शुरु
- सरकारमै बसेर एमालेको शक्ति प्रदर्शन
काठमाडौं– दुई ठुला दल नेपाली कांग्रेस र नेकपा एमाले मिलेर बनेको सरकारले ९ महिना पुरा गरेको छ । गत असार ३० सुशासनका लागि भन्दै दुई दल मिलेर एमाले अध्यक्ष प्रधानमन्त्री केपी शर्मा ओली प्रधानमन्त्री बने । ओली प्रधानमन्त्री बनेयता कामभन्दा भाषणमै रमाउन थालेका छन् ।
लोकतन्त्र दिवसको अवसरमा बिहीबार भृकुटीमण्डप ठप्प पारेर एमालेले शक्ति प्रदर्शन ग¥यो । युथ सेलिब्रेसन नाम दिइएको उक्त शक्ति प्रदर्शनमा ओलीले सरकार ढल्ने कुनै चिन्ता नभएको तर्क दिए । ‘यो संयुक्त सरकार संकल्पसहित बनेको हो । यो स्थिरता र स्थायित्वका लागि बनेको हो । सरकारको बारेमा धेरै चिन्ता गर्ने होइन, चुनावको बारेमा चिन्ता गर्नुपर्छ ।
त्यसैले एमालेले सरकार बनाउँ, सरकार बचाउँ भनेर कराएको छैन,’ ओलीले भने, ‘एमालेले जहिले पनि चुनाव हेरेको हुन्छ, हामीले ७० को चुनाव भन्यौं, ०७४ को चुनाव भन्यौं, ७९ को चुनाव भन्यौं अब ०८४ को चुनाव भनिरहेका छौं । त्यसैले ढुक्कले मिसन ०८४ मा लाग्नुस् ।’
दैनिकजसो भाषणमा रमाउन थालेकै कारण ओलीसँगै एमालेले जनविश्वास गुमाउँदै छ । तर ओली भने भाषणमै रमाउन थालेका छन् । आवासीय चिकित्सकदेखि शिक्षकहरु आन्दोलनमा छन् । राष्ट्रिय प्रजातन्त्र पार्टी राजसंस्थाको पक्षमा निरन्तर आन्दोलनमा छ । पछिल्लो ९ महिनामा सरकारले उल्लेखनीय केही काम गर्न सकेको छैन ।
यस्तो अवस्थामा सहयात्री र सबैभन्दा ठुलो दल नेपाली कांग्रेस टुलुटुलु हेरेर बसेको छ । कांग्रेस सभापति शेरबहादुर देउवा प्रधानमन्त्री पदको पखाईमा छन् । ओलीले उनलाई अबको १५ महिनामा प्रधानमन्त्री बनाउने वचन दिँदै आएका छन् । कांग्रेसका महामन्त्रीहरु भने सरकारमा बाध्यताले बसेको बताइरहेका छन् ।
लोकतन्त्र दिवसमा आयोजित एक कार्यक्रममा कांग्रेस महामन्त्री गगन थापाले भने, ‘हामीले समस्याको कुरा मात्रै गरेर हुँदैन समाधान पनि दिनुपर्छ । आज हामी बाध्यतामा छौँ, एक्लै छैनौँ सरकारमा छौँ । कतिपय हामीले कम्प्रमाइज गरेका छौँ ।’ पछिल्लो दिनमा गभर्नर नियुक्ती प्रकरणका कारण कांग्रेस र एमालेमा खटपट बढेको छ । कांग्रेसले जसरी पनि यो पदमा आफू निकटका व्यक्तिलाई नियुक्त गर्ने भन्दै अड्डी कसेको छ ।
एमालेले पनि कसैगरी यो पद आफ्नो पोल्टाबाट बाहिर जान नदिने अडान कसेको छ । यही विषयमा राजनीति पिल्सिएकोले थापाले यस्तै भए सरकारबाट बाहिर जान सक्ने चेतावनीसमेत दिए । ‘आधारभूत कुरामा हामी कम्प्रमाइज गर्दैनौँ । हामीले भन्न सक्नुपर्छ, प¥यो भने यस्तो सरकारबाट बाहिर जान्छौँ हामी । सरकारै सबैभन्दा ठूलो कुरा होइन,’ थापाले भने ।
सरकारले चैत २४ गतेबाट रिक्त रहेको गभर्नर पदमा नियुक्ती प्रक्रिया अघि बढाउन सकेको छैन । कांग्रेसले अडान नछाडेसँगै कूर्सी धरमरमा परेपछि प्रधानमन्त्री ओली गभर्नर पद कांग्रेसलाई जिम्म लगाउन तयार भएको थियो । कांग्रेसले गुणाकर भट्टलाई गभर्नर बनाउने तयारी गरेको थियो । तर उनको नाम पनि विवादमा तानिएपछि अहिले यो विषय सेलाएको छ ।
यस्तो अवस्थामा अब के गर्ने ? नेपाली कांग्रेसका प्रवक्ता डा प्रकाशशरण महतले गभर्नर नियुक्ती ढिलाई दुर्भाग्यपूर्ण भएको बताएका छन् । विपी चिन्तान प्रतिष्ठानले बिहीबार काठमाडौंमा आयोजना गरेको कार्यक्रममा महतले यस्तो बताएका हुन् । पूर्वअर्थमन्त्रीसमेत रहेका महतले अर्थतन्त्रलाई केन्द्रमा राखेर काम गर्ने व्यक्तिलाई गभर्नर बनाउनुपर्नेमा यसलाई अनावश्यक विवाद झिकेर नियुक्तीमा ढिलाई गर्नु तार्किक नभएको बताए ।
यसो त ओली नेतृत्वको सरकारले दैनिकजसो हुकुमी शासनको झल्को दिनेगरी मन्त्री हटाउनेदेखि विवादित निर्णय गर्दै आएका छन् । कार्यकाल बाँकी छँदै कुलमान घिसिङलाई नेपाल विद्युत प्राधिकरणबाट हटाउनु, विद्या भट्टराईलाई असक्षम भन्दै मन्त्रीबाट हटाउनु, कुलमानलाई समर्थन गरेको भन्दै पूर्णबहादु तामाङलाई राज्यमन्त्रीबाट हटाउनुबाट ओलीको हुकुमी शैली प्रष्टिन्छ ।
यतिमात्र हैन त्रिभुवन विश्वविद्यालयका उपकुलपति केशरजंग बराललाई पदमुक्त गर्नेजस्ता विषय पनि ओलीको विवादित निर्णय हुन् । देशको अर्थतन्त्र दिनानुदिन जर्जर बनिरहेको अवस्थामा प्रधानमन्त्री ओली भने दिनानुदिन भाषणबाजीमा रमाउने र विवादास्पद् निर्णय गर्नमै व्यस्त छन् ।
