त्रिभुवन अन्तर्राष्ट्रिय विमानस्थल स्तरोन्नतिका लागि उडान कटौती गरिएको कारण देखाउँदै हवाई कम्पनीहरुले अस्वाभाविकरुपमा टिकटको मूल्य बढाए । त्यसको प्रत्यक्ष मार वैदेशिक रोजगारीमा जाने नेपालीहरुलाई परेको छ । उता भारतबाट भने निकै सस्तोमा उडान गरिरहेका छन्, त्यही हवाई कम्पनीहरु । सोही कारण सरकारले वैदेशिक रोजगारीमा जानेहरुलाई भारतको विमानस्थल प्रयोग गर्न दिने निर्णय गरेको छ । विमानस्थल स्तरोन्नतिका लागि ३० प्रतिशत उडान कटौती भएपछि हवाई भाडा दोब्बर बढाइएको जुन अस्वाभाविक मात्र होइन, अमानवीय नै भन्दा पनि फरक पर्दैन ।
युएईमा जान २५ हजार पर्ने टिकट अहिले ६० हजार रुपैयाँभन्दा बढी तिर्दा पनि पाउन छाडेको छ । रोजगारदाता कम्पनीले केही महिनाअघि नै हवाई टिकटको सम्झौता गर्नुपर्ने हुन्छ । तर, चर्को दर देखिएपछि रोजगारदाता कम्पनीहरुले पनि टिकट दिन छाडेका छन् । भैरहवामा अन्तर्राष्ट्रिय उडान बढाउन थालेयता श्रमिकले टिकट पाउन छाडेका हुन् । पहिले एउटै अन्तर्राष्ट्रिय विमानस्थल सञ्चालनमा आउँदा सहजै विदेश आउजाउ गर्न सकिने अवस्थामा देशभित्रै दुई–दुई वटा अन्तर्राष्ट्रिय विमानस्थल सञ्चालन हुँदा पनि किन भारतीय विमानस्थल प्रयोग गर्नुपर्ने अवस्था आयो ?
कतै मर्मतका नाममा भैरहवा विमानस्थल प्रयोग गर्न सरकारले प्रेसर दिएको पो हो कि ? यसले अन्तर्राष्ट्रिय विमान कम्पनीहरु रुष्ट त छैनन् ? कुनै पूर्वाधारको तयारीविना जबरजस्ती भैरहवा विमानस्थलमा उडान भर्दा पहिले पनि विस्तारै बन्द भएको थियो । सामान्यतया त्रिभुवन विमानस्थलमा आउजाउ गर्ने उडानमा आउनेभन्दा जाने यात्रुमात्र बढी हुन्छन् । यस्तो अवस्थामा पनि अन्तर्राष्ट्रिय हवाई कम्पनीले ‘रिस्क’ लिएरै उडान भरिरहेका छन् । सरकारले भैरहवालाई ‘डेस्टिनेसन’ बनाउँदा यी विषय ख्याल गरेको भए सायद वैदेशिक रोजगारीमा जानेहरुले भारतको विमानस्थल प्रयोग गर्नुपर्ने अवस्था आउने थिएन ।
सामान्यतया भारतको बाटो हुँदै अन्य देशको यात्रालाई निकै सकस मानिन्छ । खाडी मुलुकदेखि अन्य देशमा जाँदा नेपाली यात्रुले भारतीय पक्ष र नेपाली पक्षका अधिकारीहरुले नाकामै दुःख दिन्छन् । ऋण गरी कमाउन जान लागेका कामदारको भारतसम्म पुग्दा खर्च बढ्ने त भयो नै सरकारी अधिकारीहरुले दिने दुःखको पारो निकै माथि पुग्ने छ । यसअघि भारतबाट तेस्रो मुलुक जाँदा एनओसी लेटर चाहिन्थ्यो ।
अहिले सरकारले जनतालाई भारतकै विमानस्थल प्रयोग गर्न यही एउटा एनओसी नचाहिने व्यवस्था गरेको बताएको छ । दसैंयता हवाई भाडा बढाएर उडान क्षेत्र विवादमा आएकै छ । नेपाली आकाश जोखिममा छ भन्दै बिमा रकम बढाउँदा पनि हवाई भाडा बढ्दो छ । कतै भाडा बढाउने विषयमा व्यापारीहरुको मिलेमतो त छैन ? यस विषयमा गम्भीर छानबिन होस् । हवाई भाडा बढेको क्षणिक निहुँमा आफ्ना दुई–दुई वटा अन्तर्राष्ट्रिय विमानस्थल हुँदा पनि विदेशी विमानस्थल प्रयोग गर्न बाध्य नबनाइयोस् ।
