कोशीका निवर्तमान कानुनमन्त्री लिलाबल्ल्भ अधिकारी यतिबेला अनुसन्धानका लागि कानुनी कठघरा पुगेका छन् । छँदाखाँदाको मन्त्री पदको दुरुपयोग गर्दै केही युवालाई लिएर सुटुक्क जापान गएपछि उनी प्रश्नको घेरामा परेका थिए । विवादमा तानिएका अधिकारी देश फर्कनासाथ के दुरुस्त पारे भने नैतिकता देखाउँदै राजीनामा दिन भ्याए । बुधबार राजीनामा दिएका उनलाई धेरैले प्रेरणाको स्रोतका रुपमा हेरे । राजनीतिमा नैतिकता भनेको लिलाबल्लभबाट सिक्नुसम्म भने । आफूसँगै जापान भिडाएर पठाएका तीन युवासम्मलाई त्यहाँ भाग्न नदिई नेपाल ल्याएको बहादुरी मन्त्रीको अर्को सफलता थियो । यस्तो उदाहरणीय काम त कसले पो गर्ला ?
तर जब रहस्य खुल्दै आयो, लिलाबल्लभ जापान छिर्नै नपाई विमानस्थलबाटै डिपोर्ट गरिएका रहेछन् । ३६ वर्षीय दावा शेर्पा, खोटाङकै जनक राई र रसुवा घर भएका २२ वर्षीय कञ्चन देवकोटाको बयानका आधारमा प्रहरीले अहिले अनुसन्धानका लागि अधिकारीलाई हिरासतमा राखिसकेको छ । यसअघि मन्त्रीले आफूलाई कार्यकर्ताले फसाएको भन्दै अनेकन तानाबाना बुन्दै आएका थिए । उनले विभिन्न सञ्चारमाध्यममा आफूलाई बचाउने गरी समाचार पनि लेखाए ।
प्रक्रिया मिचेर विदेश पुगे पनि, मानव तस्करीको आरोप लागे पनि र सोही कारण मन्त्री पदबाट हात धुन बाध्य भए पनि उनी निर्धक्क आफू निर्दोष भएको र दशा लागेको दाबी गर्न भ्याइरहेकै थिए । तर लिलाबल्लभको तानाबानामा प्रहरीले आशंका ग¥यो । देशभरबाट उनको नैतिकतामाथि थप प्रश्न उठ्न थाल्यो । सँगै उनी आबद्ध दल नेकपा एमाले पनि बोल्न र कारबाही गर्न बाध्य भयो । एमालेले उनलाई पार्टीको सबै जिम्मेवारीबाट मुक्त ग¥यो । अन्ततः प्रहरीले आइतबार नियन्त्रणमा लियो ।
लिलाबल्लभको नैतिकताबाट हामीले के सिक्ने ? किनभने फौजदारी मुद्दामा वर्षौं वकालत गरेका मन्त्रीले किन विधि मिचे विदेश जाँदा ? आफू डिपोट भएको कुरा किन लुकाए ? आरोप लागेपछि राजीनामा दिँदा किन नैतिकताको पाठ सिकाए ? यस विषयका रहस्यहरु अनुसन्धानबाट खुल्दै जानेछ नै । तर लिलाबल्लभले आफूसँगै गएका युवकसँग एकै होटल बुक गर्नु, मन्त्रालयकै कागजमा युवाहरुलाई जापान भित्र्याएर उतै भगाउनेसम्मको योजना बनाउनु सानोतिनो विषय हैन । यस्ता विषयमा लिलाबल्लभबाट मन्त्रीहरुले पाठ सिकून् । अनि नैतिकता पनि सिकून् ।
