काठमाडौं - वैदेशिक रोजगारीका लागि साउदी पुगेका नेपाली कामदारहरुको सामाजिक सुरक्षाका सम्बन्धमा रियादस्थित नेपाली दूतावासले साउदीको सम्बन्धित पक्षसँग अन्तरक्रिया गरेको छ । साउदी अरवमा कार्यरत रहँदा कार्य–दुर्घटनामा परी घाइते तथा अंगभंग हुने कामदार तथा मृत्यु हुने कामदारका हकवालाले पाउने सामाजिक सुरक्षा विमा (गोसी) सम्बन्धमा छलफल भएको दूतावासले जनाएको छ ।
कार्य–दुर्घटना हुन नदिन तथा कम गर्न अपनाउनु पर्ने सावधानीका बिषयमासमेत दूतावास र गोसीअन्तर्गतको जनरल डिपार्टमेन्ट अफ इन्स्योरेन्स अवेरनेसबीच सचेतनामूलक कार्यशाला सञ्चालन गरिएको दूतावासद्वारा जारी विज्ञप्तिमा उल्लेख गरिएको छ ।
उक्त कार्यशालामा गोसीका मह अलखातिब र अबदुल्लरहमान अलोतैबीले कामदारलाई दिने साउदी सरकारको सामाजिक सुरक्षा बिमा, यसले समेट्ने क्षेत्र, कार्यदुर्घटनामा परी घाइते भएमा, अंगभंग भएमा वा मृत्यु भएमा प्राप्त हुने सुविधालगायतको विषयमा विद्यमान व्यवस्थाको सम्बन्धमा जानकारी दिएको दूतावासले बताएको छ ।
साथै गोसीका सम्बन्धमा साउदी सरकारले हालै गरेको संशोधनको विषयमासमेत जानकारीमूलक छलफल भएको बताइएको छ । अबदुल्लरहमान अलोतैबीले विभिन्न नियोगहरुसँगको सहकार्यमा गरिएको उल्लेखित कार्यक्रम पहिलो भएको बताउँदै निकट भविष्यमा दूतावाससँगको सहकार्यमा धेरैभन्दा धेरै नेपाली कामदारलाई समेट्नेगरी सचेतनामूलक कार्यक्रम सञ्चालन गर्ने बताएको दूतावासले जनाएको छ ।
